అభివృద్ధి అంశాలపై ఢిల్లీలో స్పీకర్ కీలక చర్చలు

ఆంధ్రప్రదేశ్ అసెంబ్లీ గౌరవ స్పీకర్ చింతకాయల అయ్యన్నపాత్రుడు గారు ఢిల్లీలో జీఎంఆర్ కన్స్ట్రక్షన్స్ అధినేతను వారి నివాసంలో మర్యాదపూర్వకంగా కలిశారు.ఈ సమావేశంలో స్పీకర్ గారు, భోగాపురం అంతర్జాతీయ విమానాశ్రయానికి అల్లూరి సీతారామరాజు గారి పేరు పెట్టినందుకు కృతజ్ఞతలు తెలియజేశారు. స్వాతంత్ర్య సమరయోధుడి పేరును దేశవ్యాప్తంగా ప్రతిష్టాత్మక ప్రాజెక్టుకు అమలు చేయడం, కేవలం గౌరవ సూచకమే కాకుండా, తరతరాలకు స్ఫూర్తినిచ్చే నిర్ణయం అని ఆయన పేర్కొన్నారు. అల్లూరి సీతారామరాజు పేరు ప్రతిసారి వినిపించినప్పుడల్లా స్వాతంత్ర్య పోరాట స్ఫూర్తి, త్యాగం, ధైర్యం గుర్తుకు వస్తుందని స్పీకర్ అభిప్రాయపడ్డారు.

భోగాపురం ఎయిర్‌పోర్టు చర్చల తర్వాత, నర్సీపట్నంలో ప్రతిష్టాత్మకంగా చేపట్టిన ట్యాంక్‌బండ్ నిర్మాణంపై విపులంగా చర్చ జరిగింది. ఈ ప్రాజెక్టు కేవలం ఒక నిర్మాణం మాత్రమే కాకుండా, స్థానిక ప్రజల జీవన ప్రమాణాలను మెరుగుపరచే, పర్యాటక అభివృద్ధికి తోడ్పడే మౌలిక సదుపాయంగా భావిస్తున్నారు.స్పీకర్ గారు ఈ ప్రాజెక్టు త్వరగా, సమర్థవంతంగా పూర్తి కావడానికి జీఎంఆర్ గారి అనుభవం, సాంకేతిక పరిజ్ఞానం, నిర్వహణా నైపుణ్యం అవసరమని సూచించారు.జీఎంఆర్ గారు నిర్మాణ నాణ్యత, సమయపాలన, ప్రజల అవసరాలను దృష్టిలో ఉంచుకొని పనులు చేపట్టాలని సూచించినట్టు సమాచారం.

భోగాపురం విమానాశ్రయం పేరు నిర్ణయం, నర్సీపట్నం ట్యాంక్‌బండ్ నిర్మాణం — ఈ రెండు ప్రాజెక్టులు కలిపి ఉత్తరాంధ్ర ప్రజల్లో అభివృద్ధి ఆశలను రెట్టింపు చేశాయి. ఎయిర్‌పోర్ట్ ద్వారా అంతర్జాతీయ ప్రమాణాల వాణిజ్యం, ఉద్యోగావకాశాలు రాబోతున్నాయనే నమ్మకం ఉంది. ట్యాంక్‌బండ్ నిర్మాణం పూర్తయితే పర్యాటకం, వ్యాపారం, నీటి వనరుల పరిరక్షణలో కొత్త అధ్యాయం ప్రారంభమవుతుందని స్థానికులు భావిస్తున్నారు.

ఈ సమావేశంలో టిడిపి రాష్ట్ర ప్రధాన కార్యదర్శి చింతకాయల విజయ్ గారు కూడా పాల్గొన్నారు. భోగాపురం విమానాశ్రయం, నర్సీపట్నం ట్యాంక్‌బండ్ వంటి ప్రాజెక్టులు ఆ ప్రాంత అభివృద్ధికి బలమైన పునాది వేస్తాయని హాజరైన నాయకులు విశ్వాసం వ్యక్తం చేశారు.