అక్కగా లయ పెర్ఫెక్ట్ రీ ఎంట్రీ !

తెలుగు తెరపై ఒకప్పటి హీరోయిన్స్‌ మళ్లీ రీ ఎంట్రీ ఇస్తున్న తీరు ఆసక్తికరంగా మారింది. ఒకప్పుడు స్టార్ హీరోయిన్లుగా మెరిసిన వారు ఇప్పుడు గ్యాప్ తర్వాత ప్రత్యేక పాత్రలతో ప్రేక్షకుల మన్ననలు అందుకుంటున్నారు. నటిగా మంచి టాలెంట్ ఉన్న వాళ్లు హీరోయిన్లుగా కాకపోయినా, కథలో కీలకమైన పాత్రలతో తిరిగి రావడానికి ఉత్సాహం చూపిస్తున్నారు.

దీనికి తాజా ఉదాహరణగా నిలిచిన అందాల హీరోయిన్ లయ. 2000ల కాలంలో తన అందం, అభినయం, ఫ్యామిలీ ఇమేజ్‌తో ప్రేక్షకులను మెప్పించిన లయ, 2010లో సినిమాలకు గుడ్‌బై చెప్పి పెళ్లి తర్వాత అమెరికాలో సెటిల్ అయింది. మధ్యలో 2018లో ‘అమర్ అక్బర్ ఆంటోని’ సినిమాలో ఓ చిన్న పాత్రలో కనిపించింది. కానీ ఇప్పుడు మాత్రం పూర్తి స్థాయి పాత్రతో రీ ఎంట్రీ ఇస్తోంది.

నితిన్ హీరోగా రూపొందుతున్న తమ్ముడు సినిమాలో లయ అతని అక్కగా నటిస్తోంది. ఫ్యామిలీ ఎమోషన్స్ ప్రధానంగా నడిచే ఈ సినిమాలో నితిన్–లయ మధ్య వచ్చే సన్నివేశాలు హైలైట్‌గా నిలుస్తాయని చిత్రబృందం చెబుతోంది. లయకు ఇప్పటికే మంచి ఫ్యామిలీ హీరోయిన్ ఇమేజ్ ఉన్న నేపథ్యంలో, ఈ సినిమా ఆమెకు తిరిగి అవకాశాల తలుపులు తెరుస్తుందని పరిశ్రమ వర్గాల అంచనా.

ఇక నితిన్ విషయానికి వస్తే, ఇటీవల వచ్చిన ‘రాబిన్ హుడ్’ ఫలితం ఆశించిన స్థాయిలో రాలేదు. అందుకే ‘తమ్ముడు’ మూవీ మీద అతను చాలా నమ్మకంగా ఉన్నాడు. ఈ సినిమా తర్వాత నితిన్, బలగం దర్శకుడు వేణుతో కలిసి ‘ఎల్లమ్మ’ అనే వెరైటీ కథతో మరో ప్రాజెక్ట్‌కు సిద్ధమవుతున్నాడు. ఒక్క మాటలో చెప్పాలంటే, లయ ‘తమ్ముడు’ ద్వారా చేసింది రీ ఎంట్రీ కాదని, కొత్త పునాది అని అనిపించేలా ఉంది.