చిరుపై స్పెషల్ షూట్ చేసిన అనిల్ !

మెగాస్టార్ చిరంజీవి, అజేయ దర్శకుడు అనిల్ రావిపూడి క్రేజీ కాంబో మూవీ గురించి ఇప్పటికే సినీ వర్గాల్లో హైప్ మొదలైంది. ఈ సినిమా లాంచ్ అయి కొద్ది రోజులయినప్పటికీ, రెగ్యులర్ షూటింగ్ ఇంకా ప్రారంభం కాలేదు. అయితే, ఇటీవల మేకర్స్ ఈ చిత్రంలో నయనతార హీరోయిన్‌గా నటిస్తున్నట్లు అధికారికంగా ప్రకటించారు. దీంతో అభిమానుల్లో ఉత్సాహం మరింత పెరిగింది. అయితే .. రెగ్యులర్ షూటింగ్ మొదలయ్యే ముందు, దర్శకుడు అనిల్ రావిపూడి చిరంజీవితో ఓ ప్రత్యేక ఫోటోషూట్‌ని పూర్తి చేశారు.

హైదరాబాద్‌లోని అన్నపూర్ణ సెవెన్ ఎకర్స్ స్టూడియోలో ఈ ఫోటోషూట్ జరిగింది. సినిమా థీమ్‌కి తగ్గట్టుగా ఈ ఫోటోషూట్‌ని రూపొందించారు. దీని ఔట్ పుట్ పై చిరంజీవి చాలా సంతృప్తి వ్యక్తం చేశారని సమాచారం. ఈ ఫోటోషూట్ సినిమా ప్రమోషన్స్‌లో కీలక పాత్ర పోషించే అవకాశం ఉందని టాక్. ఇంక ఈ సినిమా రెగ్యులర్ షూటింగ్ వచ్చే నెల నుంచి ప్రారంభం కానుంది.

అనిల్ రావిపూడి తన సినిమాలను వేగంగా, సమర్థవంతంగా పూర్తి చేయడంలో పేరుగాంచిన దర్శకుడు. గతంలో మహేష్ బాబు ‘సరిలేరు నీకెవ్వరు’, వెంకటేష్ ‘సంక్రాంతికి వస్తున్నాం’ చిత్రాలను ఆరు నెలల్లో పూర్తి చేసి, సంక్రాంతి సీజన్‌లో విడుదల చేసిన విజయ వంతమైన ట్రాక్ రికార్డ్ ఆయన సొంతం. ఈ సినిమా కూడా 2026 సంక్రాంతి పండుగ సమయానికి రిలీజ్‌కి సిద్ధంగా ఉంటుందని మేకర్స్ ధీమాగా ఉన్నారు.

ఈ చిత్రం ఒక కామెడీ ఎంటర్‌టైనర్‌గా రూపొందనుంది, ఇది చిరంజీవి ఫ్యాన్స్‌కి పూర్తి వినోదాన్ని అందించేలా ఉంటుందని అంచనా. నయనతార ప్రధాన హీరోయిన్‌గా నటిస్తుండగా, కేథరీన్ ట్రెసా మరో కీలక పాత్రలో కనిపించనుంది. ఈ ఇద్దరు నటీమణులు చిరంజీవితో స్క్రీన్ షేర్ చేయడం అభిమానులకు మరింత ఆసక్తికరంగా ఉండనుంది. సంగీత దర్శకుడు భీమ్స్ ఈ చిత్రానికి సంగీతాన్ని సమకూరుస్తున్నారు, ఇది సినిమాకి మరో హైలైట్‌గా నిలవనుంది. సాహు గరపాటి ఈ చిత్రాన్ని నిర్మిస్తున్నారు, మరియు ఆయన గత చిత్రాల నిర్మాణ నాణ్యతను బట్టి ఈ సినిమా కూడా హై ప్రొడక్షన్ వాల్యూస్‌తో రూపొందనుందని అంచనా.