పవర్ స్టార్ సినిమాలపైనే ఆశలన్నీ!

పవర్ స్టార్ పవన్ కళ్యాణ్ రాజకీయాలపై దృష్టి సారించిన తర్వాత, సినిమాలకు ఆయన ఇచ్చే శ్రద్ధ గణనీయంగా తగ్గింది. అయినప్పటికీ.. ప్రస్తుతం ఆయన నటిస్తున్న మూడు సినిమాలు వివిధ దశల్లో ఉన్నాయి. అయితే.. పవన్ సినిమాల్లో హీరోయిన్ల ఎంపికలో ఒక ఆసక్తికరమైన అంశం కనిపిస్తోంది. ఈ హీరోయిన్లు సక్సెస్ అందుకొని చాలా కాలమే అయింది. ప్రస్తుతం వీరంతా మంచి కమ్‌బ్యాక్ కోసం ఎదురు చూస్తున్నారు.

ప్రస్తుతం విడుదలకు రెడీ అయిన పవన్ కళ్యాణ్ ‘హరిహర వీరమల్లు’ లో నిధి అగర్వాల్ హీరోయిన్‌గా నటిస్తోంది. నిధి దాదాపు ఒక దశాబ్దం క్రితం తెలుగులో అడుగుపెట్టింది. "ఇస్మార్ట్ శంకర్"తో ఆమెకు మంచి గుర్తింపు వచ్చింది, కానీ ఆమె తొలి సినిమాలు.. "సవ్యసాచి", "మిస్టర్ మజ్ను" వంటివి సక్సెస్ కాలేదు. ఆమె నిరంతరం గుర్తింపు కోసం ప్రయత్నిస్తోంది. ఇప్పుడు పవన్‌తో ఈ సినిమాతో పాటు ప్రభాస్‌తో "రాజా సాబ్" సినిమా కూడా బాగా కుదిరింది. "హరిహర వీరమల్లు" హిట్ అయితే, ఆమె పాత్రకు మంచి గుర్తింపు వస్తే, ఆమె కెరీర్‌కు ఇది గొప్ప బూస్ట్ అవుతుంది.

ఇక పవన్ తదుపరి సినిమా "ఓజీ". ఇందులో ప్రియాంక అరుల్ మోహన్ హీరోయిన్‌గా నటిస్తోంది. ఆమె ఇప్పటివరకు నానితో "గ్యాంగ్‌లీడర్", "సరిపోదా శనివారం" వంటి సినిమాలతో మోడరేట్ హిట్స్ అందుకుంది. ఇప్పుడు మొదటిసారి తెలుగులో ఏ-లిస్ట్ స్టార్స్‌తో నటిస్తోంది. ఆమె పాత్ర గురించి ప్రస్తుతం స్పష్టత లేనప్పటికీ, అది స్టైలిష్‌గా.. ముఖ్యమైన పాత్రగా ఉంటుందని తెలుస్తోంది. "ఓజీ" ఆమెకు కలిసొస్తే, స్టార్ హీరోలు, దర్శకుల నుంచి మరిన్ని అవకాశాలు ఆమెను వెతుక్కుంటాయి. "హరిహర వీరమల్లు" జూలై 24న రిలీజ్ కానుండగా, "ఓజీ" సెప్టెంబర్ 25న గ్రాండ్ రిలీజ్‌కు సిద్ధమవుతోంది.

మరోవైపు, "ఉస్తాద్ భగత్ సింగ్" సినిమా హరీష్ శంకర్ దర్శకత్వంలో తెరకెక్కుతోంది. పవన్‌తో హరీష్ గతంలో చేసిన బ్లాక్‌బస్టర్ "గబ్బర్ సింగ్" తర్వాత వీరి కాంబినేషన్ లో రాబోతున్న మరో సినిమా కావడంతో దీనికి మంచి క్రేజ్ ఏర్పడింది. ఈ సినిమాలో శ్రీలీల హీరోయిన్‌గా ఎంపికైంది. ఆమె ఒకప్పుడు వరుస హిట్స్‌తో హై రైజ్ లో ఉండేది. కానీ ఇప్పుడు సక్సెస్ కోసం పోరాడుతోంది. "ఉస్తాద్" సక్సెస్ ఆమెకు టాప్ లీగ్‌లో నిలవడానికి కీలకం.

ఇక ‘ఉస్తాద్ భగత్ సింగ్’ లో రాశి ఖన్నా కూడా ఒక హీరోయిన్‌గా చేరింది. ఆమె గతంలో స్టార్స్‌తో నటించినప్పటికీ, ఇటీవల ఫోకస్‌లో లేదు. "తెలుసు కాడా" తప్ప, ఆమె వద్ద పెద్ద ప్రాజెక్టులు లేవు. "ఉస్తాద్"తో మళ్లీ స్పాట్‌లైట్‌లోకి రావాలని, సినిమా క్లిక్ అయితే డిమాండ్‌లోకి రావాలని ఆమె ఆశిస్తోంది.