నాకు ఒక్క మాట చెబితే బాగుంటుంది : వైరముత్తు
తన అధికారిక ఎక్స్ హ్యాండిల్‌లో ఆయన పేర్కొంటూ.. ఈ నిర్మాతలు తనను సంప్రదించడం లేదా సమాచారం ఇవ్వడం కూడా చేయలేదని ఆరోపించారు.;
ప్రముఖ తమిళ గీత రచయిత, రచయిత వైరముత్తు తాజాగా తన గీతాలలోని పదాలను తమిళ చిత్ర నిర్మాతలు అనుమతి తీసుకోకుండా సినిమా టైటిల్స్‌గా ఉప యోగించడంపై విమర్శలు చేశారు. తన అధికారిక ఎక్స్ హ్యాండిల్‌లో ఆయన పేర్కొంటూ.. ఈ నిర్మాతలు తనను సంప్రదించడం లేదా సమాచారం ఇవ్వడం కూడా చేయలేదని ఆరోపించారు. “ఇలా.. ఒకటి రెండు కాదు...
‘పొన్మాలై పొళుదు,’ ‘కన్ను శివందాల్ మన్ను శివక్కుం,’ ‘ఇళయ నిలా,’ ‘ఊరై తెరింజికిట్టెన్,’ ‘పనివిళుం మలర్వనం,’ ‘వెళ్ళైపుర ఒండ్రు,’ ‘పూవే పూచూడవా,’ ‘ఈరమాన రోజవే,’ ‘అంద నిలవ తాన్ కైయిల పిడిచెన్,’ ‘మౌన రాగం,’ ‘మిన్సార కన్నా,’ ‘కన్నలనే,’ ‘ఎన్నవలే,’ ‘ఉయిరే,’ ‘సందకోళి,’ ‘పూవెల్లం కెట్టుప్పార్,’ ‘తెన్మెర్కు పరువకాట్టు,’ ‘విన్నైతాండి వరువాయా,’ ‘నీతానే ఎన్ పొన్వసంతం,’ ‘కన్నుం కన్నుం కొల్లైయడితాల్,’ ‘తంగమగన్’... ఇలా ఒక పెద్ద లిస్టే ఉంటుంది’’ అని ఆయన తెలిపారు.
వైరముత్తు మరో విషయం జోడిస్తూ.. ఈ నిర్మాతలను కలిసినప్పుడు కూడా తాను వారిని దీనిపై అసలు ప్రశ్నించలేదని చెప్పారు. “సంపద ఒకరిది కాదు, జ్ఞానం అందరిదీ అవుతుందని నాకు సంతోషం కలిగింది” అని అన్నారు. “మీరు ఇలా చేయడానికి ముందు నన్ను ఎందుకు అడగలేదని అడగడం నాగరికంగా ఉండదు. కానీ, ఒక్క మాట కూడా అడగకుండా ఇలా చేయడం వారి నాగరికత లేని చర్య కాదా?” అని ఆయన అభిప్రాయపడ్డారు.
అయితే ఆయన ట్వీట్ నెటిజన్ల నుండి చాలా స్పందనలను రేకెత్తించింది. ఒక నెటిజన్ ఈ డిమాండ్ న్యాయమైనదేనా? అని ప్రశ్నించారు. “ఇలా చూస్తే ఎవరూ ఏమీ ఉపయోగించలేరు. మీ గీతాలలోని పదాలు బహుశా ఒక పుస్తకం, నవల, చిన్న కథ లేదా కవితలో ఇంతకు ముందు వచ్చి ఉండవచ్చు. ఆ రచయితలు ఆ పదాలపై హక్కు క్లెయిమ్ చేస్తే ఏమవుతుంది? ఒక పాట మొత్తం దుర్వినియోగం అయితే. మీరు ఇలా చెప్పవచ్చు” అని ఆ పోస్ట్‌లో రాశాడు. దీనిపై కోలీవుడ్ ఇండస్ట్రీ వర్గాల మధ్య చర్చలు జరుగుతున్నాయి.