యాక్షన్ ప్రారంభించిన రావణుడు

‘కేజీఎఫ్’ సిరీస్ చిత్రాలతో దేశవ్యాప్తంగా రికార్డులు సృష్టించిన కన్నడ రాక్ స్టార్ యశ్.. ఇప్పుడు తన తాజా బాలీవుడ్ ప్రాజెక్ట్ ‘రామాయణం’తో మరో సంచలనం సృష్టించేందుకు సిద్ధమవుతున్నాడు. ఈ భారీ ఎపిక్ చిత్రంలో బాలీవుడ్ స్టార్ రణ్‌బీర్ కపూర్ శ్రీరాముడిగా, సౌత్ ఇండియన్ నటి సాయి పల్లవి సీతగా నటిస్తుండగా.. యశ్ రాక్షసరాజు రావణుడి పాత్రలో శక్తిమంతమైన పెర్ఫార్మెన్స్‌తో ప్రేక్షకులను అలరించనున్నాడు.

ప్రస్తుతం ఈ సినిమా షూటింగ్ దశలో ఉంది. ప్రత్యేకించి హై-ఇంటెన్సిటీ యాక్షన్ సీక్వెన్స్‌లపై దృష్టి సారించింది. హాలీవుడ్‌లో పేరొందిన స్టంట్ కొరియోగ్రాఫర్ గై నారిస్ ఈ సినిమా కోసం యాక్షన్ సన్నివేశాలను రూపొందిస్తున్నాడు. గై నారిస్ ‘మ్యాడ్ మ్యాక్స్: ఫ్యూరీ రోడ్’, ‘ది సూసైడ్ స్క్వాడ్’ వంటి బ్లాక్‌బస్టర్ హాలీవుడ్ చిత్రాలకు స్టంట్స్ అందించిన అనుభవజ్ఞుడు. అతని నైపుణ్యంతో రామాయణంలో యాక్షన్ సీన్స్ థ్రిల్లింగ్‌గా, విజువల్‌గా అద్భుతంగా ఉండనున్నాయని అంచనా. యశ్ ఈ హై-ఓక్టేన్ యాక్షన్ సన్నివేశాల కోసం శారీరకంగా, మానసికంగా సిద్ధమవుతున్నాడు.

తాజాగా విడుదలైన ఫొటోల్లో యశ్ గడ్డం, మీసాలతో రగ్గడ్ లుక్‌లో కనిపిస్తున్నాడు. అతని ఫిజిక్, బాడీ లాంగ్వేజ్ రావణుడి పాత్రకు సరిగ్గా సరిపోతున్నాయని సినీ విశ్లేషకులు అభిప్రాయపడుతున్నారు. ఈ పాత్ర కోసం యశ్ తీవ్రమైన శారీరక శిక్షణ తీసుకున్నాడని, రావణుడి బలమైన, ఆకర్షణీయమైన వ్యక్తిత్వాన్ని తెరపై ఆవిష్కరించేందుకు పూర్తిగా సన్నద్ధమయ్యాడని తెలుస్తోంది.

నటనతో పాటు, యశ్ ఈ చిత్రంలో కో-ప్రొడ్యూసర్‌గా కూడా వ్యవహరిస్తున్నాడు. నమిత్ మల్హోత్రా నేతృత్వంలోని ప్రైమ్ ఫోకస్ స్టూడియోస్ ఈ భారీ ప్రాజెక్ట్‌కు నిర్మాణ బాధ్యతలు నిర్వహిస్తోంది, ఇది సినిమా గ్రాండియర్‌కు అదనపు బలాన్ని జోడిస్తోంది. ఈ చిత్రాన్ని ‘దంగల్’ ఫేమ్ డైరెక్టర్ నితేష్ తివారీ రూపొందిస్తున్నాడు. ఈ సినిమా రెండు భాగాలుగా విడుదల కానుంది, మొదటి భాగం 2026 దీపావళి సందర్భంగా థియేటర్లలో రిలీజ్ కానుంది.