ఈ ఇద్దరూ తల్లీ కూతుళ్ళా?

బాలీవుడ్‌ ఐకాన్‌, నృత్య సామ్రాజ్ఞిగా దశాబ్దాలుగా ప్రేక్షక హృదయాలను గెలుచుకుంటున్న మాధురీ దీక్షిత్‌ ఇప్పుడు ఓ కొత్త పాత్రలో అలరించడానికి సిద్ధమవుతున్నారు. తాజా సమాచారం ప్రకారం, ఆమె ‘మా బెహెన్’ అనే సినిమాలో త్రిప్తి దిమ్రికి తల్లిగా నటించనున్నారు. ఈ ఆసక్తికరమైన తల్లీ-కూతుళ్ల కాంబినేషన్‌ సినిమాకు ప్రధాన ఆకర్షణగా నిలవనుందని బాలీవుడ్‌ వర్గాలు అంచనా వేస్తున్నాయి.

ఈ చిత్రాన్ని దర్శకుడు సురేశ్‌ త్రివేణి రూపొందిస్తున్నారు. కుటుంబ విలువలు, భావోద్వేగాలు, హాస్యాన్ని సమన్వయంతో చూపించడంలో ఆయనకు పేరు. ‘మా బెహెన్’ కథ తల్లీ-కూతుళ్ల బంధం చుట్టూ సాగనుంది, కానీ ఇది సాధారణ కథ కాదు. తరాల మధ్య వచ్చే భిన్నత్వాలు, వారసత్వం నుండి ఉద్భవించే సంఘర్షణలు, వాటిలోని ప్రేమను వినోదాత్మకంగా చిత్రీకరించనున్నారు. ఈ సినిమా ఒకవైపు హృదయాన్ని తాకే డ్రామాగా ఉంటూనే, మరోవైపు సరదాగా, ఉల్లాసంగా అనుభూతిని అందించనుంది.

గతంలో ‘భూల్‌ భులయ్యా 3’లో మాధురీ-త్రిప్తి కలయిక అభిమానులను ఆకట్టుకుంది. వారి స్క్రీన్‌ కెమిస్ట్రీ అందరి మనసు గెలిచిన నేపథ్యంలో, ‘మా బెహెన్’లో మరోసారి వీరు కలిసి నటించడం అభిమానుల్లో ఉత్సుకతను రేకెత్తిస్తోంది. ఈ సినిమాలో మాధురీ, త్రిప్తితో పాటు శార్దూల్‌ భరద్వాజ్‌, రవి కిషన్‌ వంటి నటులు కూడా కీలక పాత్రల్లో కనిపించనున్నారు.