మళ్లీ 'పఠాన్' అవతారం ఎత్తనున్న షారుక్ ఖాన్ !

బాలీవుడ్ కింగ్ ఖాన్ షారుక్ మరోసారి ‘పఠాన్’ గా అదరగొట్టేందుకు సిద్ధమవుతున్నారు. తాజా సమాచారం ప్రకారం, బాలీవుడ్ దిగ్గజ నిర్మాత ఆదిత్య చోప్రా ఇప్పటికే 'పఠాన్ 2' స్క్రిప్ట్‌ను పూర్తి చేశారు. ఈ చిత్రాన్ని వచ్చే ఏడాది ప్రారంభంలో చిత్రీకరించేందుకు ప్లాన్ చేస్తున్నారు. 2023 మధ్యలోనే ఆదిత్య చోప్రా ‘పఠాన్ 2’ కథను రాయడం మొదలుపెట్టారు. శ్రీధర్ రాఘవన్, అబ్బాస్ టైరేవాలాతో కలిసి, ఆయన మరింత గ్రాండ్‌గా, భారీ స్థాయిలో ఈ సీక్వెల్‌ను రూపొందించడానికి ఒక అద్భుతమైన కథను సిద్ధం చేశారు. షారుక్ ఖాన్‌కు కథను వినిపించగా, ఆయన ఈ ప్రాజెక్ట్‌పై ఎంతో ఉత్సాహంగా ఉన్నారు.

ఈ భారీ యాక్షన్ చిత్రం కోసం దర్శకుడిని ఎంపిక చేయాల్సి ఉంది. మొదటి భాగాన్ని తెరకెక్కించిన సిద్ధార్థ్ ఆనంద్ ‘పఠాన్ 2’ను డైరెక్ట్ చేయట్లేదు. గత ఏడాదిలోనే ఈ విషయం స్పష్టమైంది. దీంతో, ఆదిత్య చోప్రానే స్వయంగా దర్శకత్వం వహిస్తారా లేదా అటు 'వార్ 2' సినిమా పనుల్లో బిజీగా ఉన్న అయాన్ ముఖర్జీని ఎంపిక చేస్తారా అనే ఊహాగానాలు వినిపిస్తున్నాయి. అయితే, ఇంకా ఎలాంటి అధికారిక ప్రకటన వెలువడలేదు.

ఈ సినిమా ప్రీ-ప్రొడక్షన్ పనులు ఈ ఏడాది చివర్లో ప్రారంభమవుతాయి. చిత్రీకరణను 2026 ప్రారంభంలో మొదలుపెట్టాలని ప్లాన్ చేస్తున్నారు. ప్రస్తుతం షారుక్ ఖాన్, సిద్ధార్థ్ ఆనంద్ దర్శకత్వంలో తెరకెక్కనున్న 'కింగ్' అనే యాక్షన్ థ్రిల్లర్‌లో నటించబోతున్నారు. ఈ చిత్రంలో సుహానా ఖాన్, అభిషేక్ బచ్చన్, అభయ్ వర్మ కీలక పాత్రలు పోషిస్తున్నారు. సుహానా పాత్ర ఒక కీలక మలుపులో ఇరుక్కొనగా, ఆమెకు సహాయం చేయడానికి షారుక్ ఖాన్ ఒక క్రూరమైన క్రైమ్ బాస్‌గా మారతారు. ఈ చిత్రం 2026లో విడుదలకు సిద్ధమవుతోంది. ఇక పఠాన్ 2 లో హీరోయిన్ గా మరోసారి దీపికా పదుకొణే షారుఖ్ తో రొమాన్స్ చేయబోతోంది.