‘కరాటే కిడ్’ కోసం రంగంలోకి బాలీవుడ్ స్టార్ కిడ్

ప్రపంచవ్యాప్తంగా అభిమానుల హృదయాల్లో చెరగని ముద్ర వేసిన ‘కరాటే కిడ్’ ఫ్రాంచైజ్ మరోసారి సినీ ప్రియులను అలరించడానికి సిద్ధమవుతోంది. మే 30, 2025న విడుదల కానున్న ‘కరాటే కిడ్: లెజెండ్స్’ చిత్రం ద్వారా ఈ ఐకానిక్ సిరీస్ మరో అధ్యాయాన్ని ఆవిష్కరించనుంది. ఈ చిత్రంలో యాక్షన్ లెజెండ్ జాకీ చాన్ మరోసారి తన గురువు పాత్ర అయిన మిస్టర్ హాన్‌గా ప్రేక్షకుల ముందుకు రానున్నారు. ఈసారి ఆయన శిక్షణలో హీరోగా కనిపించనున్నది యువ నటుడు బెన్ వాంగ్. ఈ సినిమా కేవలం యాక్షన్‌తోనే కాకుండా, గురు-శిష్య సంబంధం, కష్టపడి సాధించే స్ఫూర్తితో కూడిన కథాంశంతో ప్రేక్షకులను ఆకట్టుకోనుంది.

ఈ చిత్రం హిందీ ప్రేక్షకుల కోసం డబ్బింగ్ వెర్షన్‌లో కూడా విడుదల కానుంది, ఇందులో బాలీవుడ్ స్టార్ అజయ్ దేవగణ్ తన సమర్థవంతమైన గొంతుతో పాత్రలకు జీవం పోస్తున్నారు. అయితే, ఈ ప్రాజెక్ట్‌లో ఆసక్తికరమైన విషయం ఏమిటంటే, అజయ్ కుమారుడు యుగ్ దేవగణ్ ఈ చిత్రం ద్వారా వాయిస్ ఓవర్ తో బాలీవుడ్ అరంగేట్రం చేస్తున్నాడు. తండ్రి-కొడుకు ఒకే సినిమా కోసం కలిసి పనిచేయడం ఇదే తొలిసారి కావడం విశేషం. ఈ సందర్భం అజయ్ మరియు యుగ్ ఇద్దరికీ వృత్తిపరంగా, వ్యక్తిగతంగా ఒక చిరస్థాయి జ్ఞాపకంగా నిలిచిపోనుంది.

విడుదలకు ముందు జరిగిన ఒక ప్రత్యేక సంభాషణలో జాకీ చాన్, బెన్ వాంగ్‌లతో అజయ్ దేవగణ్ మరియు యుగ్ దేవగణ్ పాల్గొన్నారు. ఈ సందర్భంగా అజయ్ తన తండ్రి వీరు దేవగణ్‌ను గుర్తు చేసుకుంటూ భావోద్వేగానికి లోనయ్యారు. “నా తండ్రి నాకు మిస్టర్ మియాగీలా ఉన్నారు. ఆయన స్ఫూర్తి, ఆయన కోరికే నన్ను నటుడిగా తీర్చిదిద్దాయి. ఆయన లేకపోతే నేను ఈ స్థాయిలో ఉండేవాడిని కాదు,” అని అజయ్ హృదయపూర్వకంగా చెప్పారు. ఈ మాటలకు స్పందిస్తూ జాకీ చాన్, “నాకు ఒక్క మిస్టర్ మియాగీ మాత్రమే కాదు, ఎందరో గురువులు ఉన్నారు. నా కెరీర్‌లో నేను ఎంతో నేర్చుకున్నాను, అందరికీ నేను కృతజ్ఞుడిని,” అని తన గురువుల పట్ల కృతజ్ఞతను వ్యక్తం చేశారు. మరి ఈ సినిమా ఏ రేంజ్ లో సక్సెస్ అవుతుందో చూడాలి.