‘రేఖాచిత్రం’ సినిమా రివ్యూ

సినిమా: రేఖాచిత్రం

భాష: మలయాళం (తెలుగు డబ్బింగ్)

ఓటీటీ ప్లాట్‌ఫామ్: సోనీ లివ్

నటీనటులు: ఆసిఫ్ అలీ, అనస్వర రాజన్, సిద్ధిఖీ, శరత్ కుమార్, దిలేష్ పోత్తన్

సంగీతం: ముజీబ్ మజీద్

సినిమాటోగ్రఫీ: అప్పు ప్రభాకర్

దర్శకుడు: జోఫిన్ టీ చాకో

మలయాళంలో భారీ విజయాన్ని సాధించిన 'రేఖాచిత్రం' చిత్రం ఇప్పుడు తెలుగు ప్రేక్షకులకు కూడా అందుబాటులోకి వచ్చింది. మార్చి 7 నుండి సోనీ లివ్‌ ఓటీటీ ప్లాట్‌ఫారమ్‌లో తెలుగు డబ్బింగ్‌తో స్ట్రీమింగ్ అవుతోంది. ఈ సినిమా ఏ మేరకు ఆడియన్స్ ను థ్రిల్ చేస్తుందో ఈ రివ్యూలో చూద్దాం..

కథ

కథ 1980ల నాటి మలయాళ సినీ పరిశ్రమ చుట్టూ తిరుగుతుంది. ఓ ప్రఖ్యాత దర్శకుడు తీసిన సినిమా విడుదల కాకుండా మూలన పడి ఉంటుంది. దాదాపు 40 సంవత్సరాల తరువాత, రాజేంద్రన్ (సిద్ధిఖీ) అనే వృద్ధుడు సోషల్ మీడియా లైవ్ లోకి వెళ్లి తన పాపాన్ని అంగీకరించి ఆత్మ హత్య చేసుకుంటాడు. అతను 40 ఏళ్ల క్రితం రేఖ (అనస్వర రాజన్) అనే యువతిని హత్య చేశాడు.

ఈ ప్రకటనతో పోలీసులు అలర్ట్ అవుతారు. కానీ నిజంగా ఈ హత్య జరిగింది? లేక ఇది కేవలం ప్రచారానికి చేసిన నాటకమా? అనేది తెలియజేయడానికి రాజేంద్రన్‌ను విచారించేందుకు సస్పెండ్ అయిన పోలీస్ ఆఫీసర్ వివేక్ గోపీనాథ్ (ఆసిఫ్ అలీ) ను తిరిగి విధుల్లోకి తీసుకుంటారు.

వివేక్ గోపీనాథ్ ఈ కేసును ఛేదించేందుకు తనదైన శైలిలో దర్యాప్తు మొదలుపెడతాడు. అతను రేఖ గురించి పరిశోధించగా, గతంలో ఆమె ఒక కొత్త నటిగా పరిచయమై, ఒక సినిమా పూర్తయినప్పటికీ, అకస్మాత్తుగా కనిపించకుండా పోయినట్లు తెలుస్తుంది. ఆమె అసలు కథ ఏమిటి? ఆమె నిజంగా హత్య చేయబడిందా? రాజేంద్రన్ చెప్పినదాంట్లో నిజమెంత? ఈ ప్రశ్నలకు సమాధానం వెతికే క్రమంలో వివేక్ గోపీనాథ్ షాకింగ్ విషయాలను బయటపెడతాడు.

కథనం, నెరేటివ్ స్టైల్

‘రేఖాచిత్రం’ సినిమా కథ ఒక మిస్టరీ ఇన్వెస్టిగేషన్ డ్రామాగా ముందుకు సాగుతుంది. ఇది సాధారణంగా సీన్-టు-సీన్ రివీల్ కాకుండా, ఫ్లాష్‌బ్యాక్‌ల ద్వారా 1980ల కాలానికి, అప్పటి సినీ పరిశ్రమ పరిస్థితులకు మనల్ని తీసుకెళ్తుంది.

మలయాళ సినిమాలకు కలిగిన ప్రత్యేకతగా, అద్భుతమైన కథనాన్ని నెమ్మదిగా, సహజంగా నడిపిస్తూ, చిన్న చిన్న హింట్స్ ద్వారా మిస్టరీని పెంచుతూ వెళ్లడం జరిగింది.

పోలీస్ ఆఫీసర్ వివేక్ గోపీనాథ్ విచారణ చేయడంలో తగినంత మేధస్సును ప్రదర్శిస్తాడు. అతను ఒక ప్రముఖ డైరెక్టర్, సినిమా యూనిట్ సభ్యులు, పాత ప్రొడక్షన్ అసిస్టెంట్లను కలుస్తూ విషయాలు వెలికితీయడంలో తన ప్రత్యేకమైన స్ట్రాటజీస్ ఉపయోగిస్తాడు.

సినిమా పరిశ్రమలో కొత్త నటీనటుల బాధలు, అవకాశాల కోసం వారు పడే కష్టాలు, ఓ నటిని రహస్యంగా చంపి, ఆ సత్యాన్ని దాచేయడమేంటో తెలియజేసే విధానం ఆసక్తికరంగా ఉంటుంది.

కథ మొదటి గంటలో కొంత మెల్లగా సాగుతుందని అనిపించినా, కథలో మలుపులు, డిటెక్టివ్ ఎలిమెంట్స్ రాబోతున్నట్టు చిన్న చిన్న సూచనలు ఇస్తూ ఆసక్తిని కొనసాగిస్తుంది.

నటీనటుల ప్రదర్శన

ఆసిఫ్ అలీ పాత్ర శాంతంగా, ధైర్యంగా ఉండే పోలీస్ ఆఫీసర్‌గా కనిపిస్తుంది. ఆచితూచి మాట్లాడే విధానం, కేసును ఛేదించడంలో అతను చూపించిన ప్రతిభ, కథనం సాగింపును మరింత బలంగా చేస్తుంది. అనస్వర రాజన్ రేఖ పాత్ర 1980ల్లో ఉన్న హీరోయిన్లను పోలి ఉంటుంది. కొత్త నటిగా ఆమె చేసిన ప్రయత్నాలు, పరిశ్రమలో ఎదురైన ఇబ్బందులు, చివరికి ఆమె ఎదుర్కొన్న ఘోరమైన పరిస్థితి అన్నీ అద్భుతంగా తెరకెక్కించబడింది. సిద్ధిఖ్ పోషించిన పాత్ర కథలో కీలకమైన క్యారెక్టర్. అసలు అతను చెప్పినదంతా నిజమేనా? లేక పబ్లిసిటీ స్టంట్? అనే అంశాన్ని దర్శకుడు అద్భుతంగా ప్రదర్శించాడు.

సాంకేతిక విభాగం

1980ల కాలం లుక్ అద్భుతంగా రీక్రియేట్ చేశారు. ముఖ్యంగా కాతోడు కాతోరం సినిమాలోని మమ్ముట్టి ఏఐ యంగ్ లుక్.. అద్భుతంగా కుదిరింది. అందరూ ఆ లుక్ పై ప్రశంసలు కురిపిస్తున్నారు. పాత ఫిల్మ్ రీల్స్, సెట్స్ డిజైన్ అద్భుతంగా ఉండి, అప్పటి వాతావరణాన్ని మన ముందుకు తెస్తుంది. ముజీబ్ మజీద్ సంగీతం ..బ్యాక్‌గ్రౌండ్ స్కోర్ సినిమాలో మిస్టరీ మూమెంట్స్‌ను హైలైట్ చేస్తుంది. మెలోడీ మ్యూజిక్‌తో నాటి కాలపు అనుభూతిని అందిస్తుంది. సినిమా పేసింగ్ కొంత నెమ్మదిగా ఉన్నప్పటికీ, ఫ్లాష్‌బ్యాక్, ఇన్వెస్టిగేషన్ ట్రాక్‌లను సమతుల్యం చేస్తూ కథని నడిపించారు.

పాజిటివ్ పాయింట్స్

1980ల సినిమా పరిశ్రమ, మిస్టరీ థ్రిల్లర్ నేపథ్యం చక్కగా మిళితం చేయడం.

ఆసక్తికరమైన కథ, సస్పెన్స్-ఫిల్డ్ స్క్రీన్‌ప్లే.

ఆసిఫ్ అలీ, అనస్వర రాజన్ సహా నటీనటుల అద్భుతమైన ప్రదర్శన.

నిజమైన సంఘటనల ఆధారంగా తీర్చిదిద్దినట్లు అనిపించే కథ.

విజువల్స్, బ్యాక్‌గ్రౌండ్ స్కోర్ కథకి సహాయపడే విధంగా ఉండటం.

నెగెటివ్ పాయింట్స్

మొదటి అరగంట నెమ్మదిగా సాగుతుంది.

కొంతమంది ప్రేక్షకులకు స్లో నరేషన్ ఇబ్బంది కలిగించవచ్చు.

కథ చెప్పే విధానం కాస్త ఆర్ట్-హౌస్ స్టైల్‌లో ఉండటంతో మాస్ ఆడియన్స్‌కు అంతగా రుచించకపోవచ్చు.

చివరిగా..

‘రేఖాచిత్రం’ ఒక విభిన్నమైన మర్డర్ మిస్టరీ కథ. ఇది థ్రిల్లర్ సినిమాల్ని ఇష్టపడే వారికి నిజంగా ఒక మంచి అనుభూతిని ఇస్తుంది. ప్రత్యేకించి 1980ల సినీ పరిశ్రమను, నటీనటుల జీవితాలను, వారి బాధలను సున్నితంగా.. ఎలివేట్ చేస్తూ థ్రిల్లింగ్ మిస్టరీగా మలిచారు. తప్పక చూడాల్సిన సినిమా, ప్రత్యేకించి కథానటుల అద్భుతమైన నటన, చక్కటి మిస్టరీ థ్రిల్లర్ కోసం.