గాజాలో ఆకలి చావులు - ఫ్రాన్స్‌ సహాయం

ఇజ్రాయెల్‌ దాడులు, నిర్బంధాల వల్ల గాజా ప్రాంతంలో తీవ్రమైన ఆకలి, ఆహార కొరత నెలకొంది. పోషకాహార లోపం కారణంగా వేలాది మంది బలహీనతకు గురై ప్రాణాలను కోల్పోతున్నారు. ఐక్యరాజ్యసమితి ఈ పరిస్థితిని “తీవ్ర మానవ విపత్తు”గా అభివర్ణించింది.

ఈ సంక్షోభాన్ని ఎదుర్కొంటున్న గాజా ప్రజలకు ఉపశమనం కల్పించడానికి, ఫ్రాన్స్ ప్రభుత్వం ఆగస్టు 1న జోర్డాన్‌ నుంచి 40 టన్నుల ఆహార పదార్థాలను ఎయిర్‌డ్రాప్ ద్వారా పంపించింది. నాలుగు విమానాలు ఈ సహాయాన్ని అందించాయి, ప్రతి విమానంలో 10 టన్నుల సరుకును గాజా పై నుంచి పడవేశారు.

ఫ్రాన్స్ అధ్యక్షుడు ఎమాన్యుయెల్‌ మాక్రోన్‌ మాట్లాడుతూ, “ఎయిర్‌డ్రాప్‌లు కేవలం తాత్కాలిక ఉపశమనం మాత్రమే అని, దీర్ఘకాలిక పరిష్కారం కోసం ఇజ్రాయెల్‌ భూమార్గాల ద్వారా నిరంతర సహాయం అనుమతించాలి” అని అన్నారు. అలాగే గాజాకు ఇంతకు ముందు సహాయం చేసిన జోర్డాన్‌, యూఏఈ, జర్మనీ ప్రభుత్వాలను ఆయన ప్రశంసించారు.

ఫ్రాన్స్‌ విదేశాంగ మరియు రక్షణ మంత్రిత్వశాఖలు కూడా రాబోయే రోజుల్లో రోడ్డు మార్గాల ద్వారా మరిన్ని టన్నుల ఆహారాన్ని గాజాకు పంపించేందుకు సిద్ధమని వెల్లడించాయి. భూమార్గాల ద్వారానే పెద్ద మొత్తంలో సహాయం వేగంగా అందించవచ్చని నిపుణులు అభిప్రాయపడ్డారు.

గాజాలో అమెరికా–ఇజ్రాయెల్ మద్దతుతో నడుస్తున్న Gaza Humanitarian Foundation (GHF) సహాయ పంపిణీ విధానం పట్ల ఫ్రాన్స్‌ విదేశాంగ మంత్రి జీన్-నోయెల్‌ బార్రోట్‌ తీవ్ర ఆక్షేపణలు వ్యక్తం చేశారు. సహాయం కోసం వచ్చిన ప్రజలు కాల్పులు, గందరగోళం కారణంగా ప్రాణాలు కోల్పోయిన ఘటనలు నమోదయ్యాయని ఆయన పేర్కొన్నారు.

ఐక్యరాజ్యసమితి, WHO, WFP వంటి అంతర్జాతీయ సంస్థలు ఎయిర్‌డ్రాప్‌లను “సముద్రంలో చుక్క నీటి తో పోల్చాయి. ఆకలి విపత్తు నివారణకు భూమార్గాల ద్వారానే నిరంతర సహాయ సరఫరా సాధ్యమని హెచ్చరించాయి.

గాజాలో కొనసాగుతున్న యుద్ధంలో ఇప్పటి వరకు 60,000 మందికిపైగా మరణించగా, సుమారు 1.45 లక్షల మంది గాయపడ్డారు. మృతుల్లో పెద్ద సంఖ్యలో మహిళలు, చిన్నారులు ఉన్నారు. అయితే, వీరిలో ఎంతమంది సామాన్య పౌరులు, ఎంతమంది యుద్ధంలో పాల్గొన్న వారో స్పష్టత లేదు.