సీఎం రేవంత్ రూపంలో గణేశుడు

రాష్ట్రవ్యాప్తంగా గణేశ్ నవరాత్రి ఉత్సవాలు వైభవంగా మొదలయ్యాయి. సందర్భంగా హైదరాబాద్ గోషామహల్‌లో ప్రత్యేక ఆకర్షణగా "రైజింగ్ తెలంగాణ" పేరిట వినూత్న గణేష్ విగ్రహాన్ని ప్రతిష్టించారు.

తెలంగాణ రైజింగ్ కార్పొరేషన్ చైర్మన్ మెట్టు సాయి కుమార్ ఆధ్వర్యంలో ఏర్పాటు చేసిన ఈ మండపం స్థానికుల దృష్టిని ఆకర్షిస్తోంది. ముఖ్యంగా ఈసారి గణనాథుడిని తెలంగాణ సీఎం రేవంత్ రెడ్డి రూపంలో తీర్చిదిద్దడం విశేషం.

రేవంత్ రెడ్డి వేషధారణలో గణపతి విగ్రహం నిలవడంతో భక్తులు, ప్రజలు ఆశ్చర్యం వ్యక్తం చేస్తున్నారు. ఇప్పటికే సోషల్ మీడియాలో ఈ ప్రత్యేక గణపతి విగ్రహం ఫోటోలు వైరల్ అవుతూ పెద్ద చర్చనీయాంశంగా మారాయి.