బీజేపీలో చేరనున్న బీఆర్‌ఎస్ మాజీ ఎమ్మెల్యే బాలరాజు

తెలంగాణ రాష్ట్రంలో కీలకంగా సంభవించిన రాజకీయ పరిణామాల్లో మార్పుల భాగంగా, నాగర్‌కర్నూల్ మాజీ ఎమ్మెల్యే డాక్టర్ గువ్వల బాలరాజు బీఆర్‌ఎస్ పార్టీకి రాజీనామా చేసి భారతీయ జనతా పార్టీ (బీజేపీ)లో చేరేందుకు తుది నిర్ణయం తీసుకున్నారు. ఆయన ఈ నిర్ణయాన్ని ప్రకటించినప్పటి నుంచి రాష్ట్ర రాజకీయాల్లో ఆసక్తికర చర్చ జరుగుతోంది. ఇటీవల ఆయన బీఆర్‌ఎస్ అధినేత కేసీఆర్‌కు రాజీనామా లేఖ పంపుతూ తన రాజకీయ ప్రయాణాన్ని కొత్త దశలోకి తీసుకెళ్లాలని భావిస్తున్నట్లు తెలిపారు.

బీజేపీలో చేరికకు ఇప్పటికే ముహూర్తం ఖరారైంది. గువ్వల బాలరాజు ఈ నెల 10వ తేదీ ఉదయం 10 గంటలకు హైదరాబాదులోని బీజేపీ రాష్ట్ర కార్యాలయంలో పార్టీ కండువా కప్పుకోనున్నారు. ఈ కార్యక్రమంలో బీజేపీ రాష్ట్ర, జాతీయ నాయకులు పాల్గొననున్నట్లు సమాచారం. ఈ చేరికతో బీజేపీకి గిరిజన విభాగంలో బలమైన నాయకత్వం లభించనుంది.

గత కొన్ని నెలలుగా గువ్వల బాలరాజు బీఆర్‌ఎస్ పార్టీపై అసంతృప్తిగా ఉన్నారని, ముఖ్యంగా ఎంపీ టికెట్ విషయంలో తనకు అన్యాయం జరిగిందని భావించినట్లు సమాచారం. పార్టీలో కొత్తగా చేరిన నేతలకు ప్రాధాన్యం ఇవ్వడం వల్ల ఆయన నిరుత్సాహానికి గురిఅయినట్టు తెలుస్తుంది. ఇటీవల లీక్ అయిన ఓ ఆడియోలో ఆయన పార్టీపై తీవ్ర అసంతృప్తిని వ్యక్తం చేసినట్లు కూడా వెల్లడయ్యింది.

గువ్వల బాలరాజు బీజేపీలో చేరుతున్నది కేవలం వ్యక్తిగత నిర్ణయం మాత్రమే కాకుండా, రాష్ట్ర రాజకీయాలపై ప్రభావం చూపే పరిణామంగా విశ్లేషకులు భావిస్తున్నారు. బీఆర్‌ఎస్ పార్టీకి ఇది ఒక పెద్ద షాక్‌గా మారనుంది. మరోవైపు బీజేపీ ‘ఆపరేషన్ ఆకర్ష్’ ద్వారా బీఆర్‌ఎస్ నేతలను ఆకర్షించే వ్యూహంలో భాగంగా ఈ చేరికను కీలక ముందడుగుగా పరిగణిస్తోంది. పార్టీలో మరికొంతమంది నేతలు కూడా త్వరలోనే బీజేపీలో చేరే అవకాశాలు ఉన్నట్లు సమాచారం.

ఈ పరిణామాలతో రాష్ట్ర రాజకీయాల్లో ఉత్కంఠ పెరిగింది. వచ్చే స్థానిక సంస్థల ఎన్నికల దృష్ట్యా బీజేపీ, బీఆర్‌ఎస్ మధ్య పోటీ మరింత రసవత్తరంగా మారనున్నది. గువ్వల బాలరాజు చేరికతో బీజేపీ గిరిజన ఓటు బ్యాంకు పటిష్టంగా మలుచుకునే అవకాశం ఉన్నదని విశ్లేషణలు చెబుతున్నాయి.