విశాఖలో నేటి నుంచి ఆంధ్రా ప్రీమియర్ లీగ్‌

రాష్ట్రంలోని క్రికెట్‌ అభిమానులకు ఆనందాన్ని కలిగించేలా ఆంధ్రా ప్రీమియర్ లీగ్‌ (APL) టోర్నమెంట్ నేటి నుంచి విశాఖపట్నంలో ప్రారంభం కానుంది. ఈ క్రికెట్‌ లీగ్‌ను కేంద్ర మంత్రి రామ్మోహన్ నాయుడు ప్రారంభించనున్నారు. ఈ సందర్భంగా ACA–VDCA (ఆంధ్ర క్రికెట్ అసోసియేషన్ – విశాఖపట్నం జిల్లా క్రికెట్ అసోసియేషన్ ) స్టేడియంలో ఘనంగా ప్రారంభోత్సవ కార్యక్రమం జరగనుంది.

ఈ టోర్నమెంట్‌లో రాష్ట్రం నలుమూలల నుండి ఎంపికైన ప్రతిభావంతులైన యువ క్రికెటర్లు పాల్గొననున్నారు. ఆంధ్ర క్రికెట్ అసోసియేషన్ (ACA) ఆధ్వర్యంలో టోర్నీ నిర్వహణకు సంబంధించి అన్ని ఏర్పాట్లను పూర్తిచేశారు. జట్ల ఎంపిక, షెడ్యూల్, భద్రతా ఏర్పాట్లు తదితర అన్ని విభాగాల్లో కూడ తగిన విధంగా చర్యలు తీసుకున్నారు.

ఈ టోర్నమెంట్‌ ప్రత్యేక ఆకర్షణగా, ప్రేక్షకులకు ఉచిత ప్రవేశం కల్పించారు. క్రికెట్ ప్రేమికులు టికెట్ల అవసరం లేకుండానే ACA–VDCA స్టేడియంలోని ప్రవేశ ద్వారాల వద్ద నేరుగా ప్రవేశించి మ్యాచ్‌లు ప్రత్యక్షంగా వీక్షించవచ్చు. ఇది రాష్ట్ర క్రికెట్ అభివృద్ధికి ప్రోత్సాహకరంగా మారనుంది.

ఇంకా, ఈ మ్యాచ్‌లు కొన్ని టెలివిజన్ ఛానళ్లు మరియు యూట్యూబ్ వేదికల ద్వారా ప్రత్యక్ష ప్రసారంగా ప్రసారం చేయబడతాయి. అందువల్ల స్టేడియానికి రాని అభిమానులు ఇంటిలో నుండే ఈ క్రికెట్‌ పోటీలను ఆస్వాదించవచ్చు.