ఈ డైరెక్టర్స్ ఏమైపోయారు?

గతంలో డైరెక్టర్లు ఒకటి రెండు ఫ్లాప్‌లు వచ్చినా సుదీర్ఘ కెరీర్‌ను కొనసాగించేవారు. కానీ ఇప్పుడు సీన్ మారింది. ఒక్క డిజాస్టర్‌తోనే డైరెక్టర్ల కెరీర్‌కు గండి పడుతోంది. టాలీవుడ్‌లో పలువురు విజయవంతమైన డైరెక్టర్లు ఇప్పుడు అవకాశాల కోసం ఎదురుచూస్తున్నారు. వాళ్ల చేతిలో కొత్త ప్రాజెక్టులు లేవు, సంవత్సరాల తరబడి వేచి చూస్తున్నారు.

పరశురాం

విజయ్ దేవరకొండ నటించిన గీతా గోవిందంతో స్టార్ డైరెక్టర్ అయ్యాడు. కానీ ఫ్యామిలీ స్టార్తో బాగా ట్రోల్ అయ్యాడు. దాదాపు సంవత్సరం గడిచినా, అతని తదుపరి ప్రాజెక్ట్ గురించి ఎలాంటి అప్‌డేట్ లేదు.

శివ నిర్వాణ

విజయ్ దేవరకొండ, సమంత జంటగా ఖుషి తెరకెక్కింది. హైప్ ఉన్నా, సినిమా అంచనాలను అందుకోలేకపోయింది. శివ నిర్వాణ పలువురు హీరోలతో మాట్లాడినా, కొత్త ప్రాజెక్ట్ సెట్ కాలేదు. నాగ చైతన్యతో ఓ ప్రాజెక్ట్ గురించి చర్చలు జరిగాయి కానీ అది కార్యరూపం దాల్చలేదు. ప్రస్తుతం వెయిటింగ్ మోడ్‌లో ఉన్నాడు.

బొమ్మరిల్లు భాస్కర్

మోస్ట్ ఎలిజిబుల్ బ్యాచిలర్ తో బౌన్స్ బ్యాక్ అయిన భాస్కర్.. ‘జాక్’ సినిమాతో భారీ ఫ్లాప్‌ను చవిచూశాడు. ప్రస్తుతం అతని చేతిలో ఎలాంటి ప్రాజెక్ట్ లేదు.

శ్రీకాంత్ అడ్డాల

బ్రహ్మోత్సవం అతని కెరీర్‌కు పెద్ద దెబ్బ తీసింది. ఆ తర్వాత ‘పెద కాపు’ కూడా నిరాశపరిచింది. శ్రీకాంత్ కెరీర్‌ను రీవైవ్ చేయాలని చూస్తున్నాడు కానీ పెద్ద అవకాశాలు రావడం లేదు.

కళ్యాణ్ కృష్ణ

నాగార్జున ‘సోగ్గాడే చిన్ని నాయనా’ తో డైరెక్టర్‌గా గట్టి ముద్ర వేశాడు. ఆ తర్వాత ‘రారండోయ్ వేడుక చూద్దాం, నేల టికెట్, బంగార్రాజు’ తీశాడు కానీ ఇప్పుడు అతని చేతిలో కొత్త సినిమాలు లేవు.

శ్రీరామ్ ఆదిత్య

అతన్ని లక్కీ డైరెక్టర్ అనొచ్చు, ఎందుకంటే చాలా అవకాశాలు వచ్చాయి. కానీ ‘భలే మంచి రోజు, శమంతకమణి, దేవదాస్, హీరో, మనమే’ వంటి సినిమాలు బాక్సాఫీస్ వద్ద ఆడలేదు. ప్రస్తుతం అతని చేతిలో సినిమాలు లేవు.

శశి కిరణ్ తిక్కా

అడివి శేష్‌తో ‘గూఢచారి, మేజర్’ వంటి హిట్ సినిమాలు తీశాడు. కానీ తదుపరి ప్రాజెక్ట్ గురించి ఇంకా ప్రకటన రాలేదు. కాజల్ నటించిన ‘సత్యభామ’ ను నిర్మించాడు కానీ అది ఫ్లాప్ అయింది. గత కొన్ని నెలలుగా అతని గురించి పెద్దగా వార్తలు లేవు.

విజయ్ బిన్నీ

కొరియోగ్రాఫర్‌గా ఉన్న విజయ్ బిన్నీ, నాగార్జున ‘నా సామి రంగ’ తో డైరెక్టర్‌గా డెబ్యూ చేశాడు. సినిమా డీసెంట్ హిట్ అయినా, అతనికి తదుపరి సినిమా అవకాశం రాలేదు.

శ్రీనివాస్ అవసరాల

నటుడిగా, డైరెక్టర్‌గా పేరు తెచ్చుకున్న శ్రీనివాస్ ప్రస్తుతం డైరెక్టర్‌గా సినిమాలు తీయడం లేదు. నటుడిగా కూడా బిజీగా లేడు. కెరీర్‌ను రీస్టార్ట్ చేయాలని చూస్తున్నాడు.

మహి వి. రాఘవ్

‘యాత్ర 2’ తర్వాత మహి తదుపరి సినిమా గురించి ప్రకటించలేదు. వెబ్ సిరీస్‌లతో బిజీగా ఉన్నాడు కానీ ఫీచర్ ఫిల్మ్‌లు లేవు.

పల్నాటి సూర్య ప్రతాప్

‘కుమారి 21F’ తో గుర్తింపు తెచ్చుకున్న సూర్య ప్రతాప్, ‘18 పేజెస్’ వంటి సినిమాలు తీశాడు. కానీ చాలా సంవత్సరాలుగా అతని నుంచి కొత్త ప్రాజెక్ట్ ప్రకటనలు లేవు.

వీరు పోట్ల

ఒకప్పుడు స్టార్ రైటర్‌గా గుర్తింపు తెచ్చుకున్న వీరు పోట్ల... ‘బిందాస్, రగడ’ వంటి సినిమాలు తీశాడు. కానీ ఆ తర్వాత వచ్చిన సినిమాలు ఆడలేదు. సాయి ధరమ్ తేజ్‌తో ఓ సినిమా కోసం చర్చలు జరిగాయి కానీ అది ఆగిపోయింది. ప్రస్తుతం అతని చేతిలో ప్రాజెక్టులు లేవు.