నిశ్చితార్ధం కాదు.. పుట్టినరోజు వేడుకలు

టాలీవుడ్ క్రేజీ బ్యూటీ శ్రీలీల ఇటీవల తన ఇన్‌స్టాగ్రామ్ స్టోరీస్‌లో కొన్ని ఫోటోలు పోస్ట్ చేసి నిశ్చితార్థం గురించిన పుకార్లకు తెరలేపింది. సాంప్రదాయ దుస్తుల్లో, కుటుంబ సభ్యులతో కలిసి ఉన్న ఆ ఫోటోలు చూసి చాలామంది ఆమె నిశ్చితార్థం జరగబోతోందని, వరుడు ఎవరా అని ఊహాగానాలు చేశారు. కానీ, శ్రీలీల వెంటనే ఆ పుకార్లకు ఫుల్ స్టాప్ పెడుతూ.. తన మెయిన్ ఇన్‌స్టాగ్రామ్ ఫీడ్‌లో కొత్త ఫోటోలు పోస్ట్ చేసి.. అది తన పుట్టినరోజు ముందస్తు వేడుకలని స్పష్టం చేసింది.

జూన్ 14కు.. 24 ఏళ్లు నిండబోతున్న శ్రీలీల.. ఆ ఫోటోల్లో సాంప్రదాయ సిల్క్ చీరలో కనిపించింది. ఒక ఫోటోలో ఆమెను బుట్టలో ఎత్తి తులభారం ఆచారం చేస్తున్న దృశ్యం కనిపించింది. ఈ హిందూ సాంప్రదాయంలో ఒక వ్యక్తిని బంగారం, బియ్యం లేదా ఇతర వస్తువులతో తూచి.. వాటిని దేవుడికి సమర్పిస్తారు. ఈ వేడుక చూసిన చాలామంది ఆశ్చర్యపోయారు, ఎందుకంటే ఇలాంటి ఘనమైన ఆచారం సాధారణంగా పెళ్లిళ్లు లేదా నిశ్చితార్థాల్లో చూస్తారు, కానీ ఇది ఆమె పుట్టినరోజుకు 15 రోజుల ముందు జరగడం విచిత్రంగా అనిపించింది.

కొందరు అభిమానులు ఈ పుట్టినరోజు వేడుకలో పెళ్లి ఆచారాల లక్షణాలు ఉండటం అసాధారణంగా భావించారు. శ్రీలీల తన పోస్ట్‌లో ఈ సాంప్రదాయం గురించి వివరిస్తూ, “పాత రోజుల్లో మా ఇంట్లో పుట్టినరోజులు ఇలా జరుపుకునేవాళ్లం” అని చెప్పింది. ఈ వేడుక సమయం కొంత విచిత్రంగా అనిపించినా, ఆమె స్పష్టీకరణ వైరల్ ఫోటోల వెనుక నిజం తెలుసుకోవాలనుకున్న అభిమానులకు ఊరటనిచ్చింది.