నైట్ షూట్స్ లో రామ్ చరణ్ ‘పెద్ది’

‘గేమ్ చేంజర్’ పై ఆశలు పెట్టుకున్న అభిమానులు కొందరు నిరాశ చెందగా.. ఇప్పుడు వారి దృష్టి రామ్ చరణ్ తదుపరి ప్రాజెక్ట్ ‘పెద్ది’ పై కేంద్రీకృతమైంది. ఈ సినిమా ఓ భిన్నమైన కథను, కఠిన శ్రమతో నిండిన జీవితాన్ని తెరపై చూపించ బోతున్నట్టు సమాచారం. బుచ్చి బాబు సానా దర్శకత్వం వహిస్తున్న ఈ చిత్రం షూటింగ్ తాజాగా హైదరాబాదులో ప్రారంభమైంది. ప్రత్యేకంగా రూపొందించిన భారీ నైట్ షెడ్స్‌లో పదిహేను రోజుల పాటు జరుగనున్న ఈ షెడ్యూల్ రాత్రిపూట మాత్రమే జరుగుతోంది.

ఇందులో ముఖ్యమైన సన్నివేశాలు, కీలక ఫైట్ సీక్వెన్స్‌ లు తెరకెక్కించనున్నారు. ఈ సినిమాలో రామ్ చరణ్ ఒక క్రీడా కార్మికుడి పాత్రలో కనిపించనున్నారు. మట్టి వాసన, మానవీయ భావోద్వేగాలు, శ్రమ, పోరాటం ప్రధానంగా ఉండే ఈ పాత్ర, అతడి నటనా పరిపక్వతను మరో స్థాయికి తీసుకెళ్లే అవకాశం ఉందని భావిస్తున్నారు. జాన్వీ కపూర్, శివరాజ్‌కుమార్, జగపతి బాబు, దివ్యేందు శర్మ వంటి ప్రతిభావంతులైన నటులు ఈ చిత్రంలో ప్రధాన పాత్రలు పోషిస్తున్నారు.

మైత్రీ మూవీ మేకర్స్, సుకుమార్ రైటింగ్స్ బ్యానర్లపై ఈ సినిమా రూపొందుతోంది. సంగీతాన్ని ఏ.ఆర్. రెహమాన్ అందించగా, ఛాయాగ్రహణ బాధ్యతలు రత్నవేలు తీసుకున్నారు. వీరి అనుభవంతో ఈ సినిమా విజువల్‌గా మరియు మ్యూజికల్‌గా అద్భుతంగా ఉండనుంది. ఎటువంటి భారీ ప్రమోషన్లూ లేకుండా, ఈ సినిమా ముందుకెళ్తోంది. అయితే ఈ 10 రాత్రుల ఇంటెన్స్ షెడ్యూల్ చూస్తేనే, మేకర్స్ ఎంత బలమైన కంటెంట్‌ను రూపొందించాలనుకుంటున్నారో అర్థమవుతుంది. రామ్ చరణ్ అభిమానులు ఎప్పటినుంచో ఎదురు చూస్తున్న సినిమా ఇదే కావచ్చు.