జూలైలో మాస్ సినిమాల జాతర

టాలీవుడ్ లో 2025 సమ్మర్ సీజన్ నీరసంగా ముగిసింది. పెద్ద బడ్జెట్ సినిమాలు తక్కువగా రిలీజ్ అయ్యాయి. మెజారిటీ ఫిల్మ్స్ బాక్సాఫీస్‌ వద్ద ఆశించిన రీతిలో ఆకట్టుకోలేదు. సమ్మర్ హాలిడే పీరియడ్ జూన్ 12తో ముగిసింది. అయితే, సమ్మర్ తర్వాత వచ్చిన రెండు సినిమాలు ఇండస్ట్రీకి కొంత ఊరటనిచ్చాయి. శేఖర్ కమ్ముల డైరెక్షన్‌లో జూన్ 20న విడుదలైన “కుబేర”, జూన్ 27న రిలీజ్ అయిన మంచు విష్ణు “కన్నప్ప” బాక్సాఫీస్‌ వద్ద బలమైన ఓపెనింగ్స్ సాధించాయి. ఇప్పుడు దృష్టి వర్షాకాల సీజన్‌పైకి మళ్లింది. ఇంక జులైలో ఒక భారీ సినిమాతో పాటు రెండు మంచి మిడ్-రేంజ్ ఫిల్మ్స్ రాబోతున్నాయి.

తమ్ముడు – జులై 04

నితిన్ నటిస్తున్న “తమ్ముడు” సినిమాపై భారీ అంచనాలు పెట్టుకున్నాడు. ఈ చిత్రం అక్క తమ్ముడు సెంటిమెంట్‌తో పాటు యాక్షన్, సామాజిక సందేశాన్ని కలగలిపిన కథాంశంతో రూపొందింది. “వకీల్ సాబ్” ఫేమ్ శ్రీరామ్ వేణు డైరెక్ట్ చేస్తున్న ఈ సినిమాని దిల్ రాజు నిర్మిస్తున్నారు. ప్రమోషన్స్ జోరందుకున్నాయి.

నితిన్ ఇటీవలి సినిమాలు ఆశించిన స్థాయిలో రాణించకపోవడంతో ప్రమోషనల్ యాక్టివిటీస్‌లో కాస్త తక్కువగా కనిపిస్తున్నాడు. అయినప్పటికీ, దిల్ రాజు ఈ సినిమా ప్రేక్షకులను ఆకట్టుకుంటుందని నమ్మకంగా ఉన్నారు.

2000లలో పాపులర్ హీరోయిన్ అయిన లయ, నితిన్ సిస్టర్ రోల్‌లో రీ-ఎంట్రీ ఇస్తోంది. “కాంతార” ఫేమ్ కన్నడ నటి సప్తమి గౌడ టాలీవుడ్ లో హీరోయిన్ గా అడుగుపెడుతోంది. సంగీతం కూడా ‘కాంతార’ ఫేమ్ అజనీష్ లోక్‌నాథ్ అందిస్తున్నారు.

ఘాటి – జులై 11

అనుష్క శెట్టి, డైరెక్టర్ క్రిష్ “వేదం” తర్వాత మళ్లీ కొలాబరేట్ అయ్యారు. క్రిష్ ఈసారి ఉత్తరాంధ్ర ప్రాంతంలో గంజాయి స్మగ్లింగ్ ట్రేడ్‌ని కథాంశంగా తీసుకొని “ఘాటి”ని రూపొందించారు.

అనుష్క గంజాయి వ్యాపారాన్ని నడిపే శక్తిమంతమైన డాన్ పాత్రలో నటిస్తూ, తన స్క్రీన్ పర్సనాలో బోల్డ్ ట్రాన్స్‌ఫర్మేషన్‌ని చూపిస్తోంది. రెండేళ్ల గ్యాప్ తర్వాత సినిమాల్లోకి రీ-ఎంట్రీ ఇస్తున్న అనుష్క సినిమాకి మంచి బజ్ క్రియేట్ అవుతోంది. “ఘాటి” బాక్సాఫీస్‌లో బిగ్ ఓపెనింగ్ సాధించే అవకాశం ఉంది.

అదే రోజు, జులై 11న సుహాస్ నటించిన “ఓ భామ అయ్యో రామ” కూడా రిలీజ్ కానుంది. ఇటీవల బాక్సాఫీస్ వద్ద నిరాశపరిచిన సుహాస్ ఈ సినిమాతో కమ్‌బ్యాక్ ఆశిస్తున్నాడు.

జూనియర్ – జులై 18

శ్రీలీల నటించిన “జూనియర్” ప్రధానంగా కన్నడ ప్రేక్షకుల కోసం రూపొందింది, కానీ ఆసక్తికరంగా ఈ సినిమా పూర్తిగా తెలుగు టీమ్‌తో తెరకెక్కుతోంది. రాజకీయ నాయకుడు, వ్యాపారవేత్త గాలి జనార్ధన రెడ్డి కొడుకు కిరీటి ఈ సినిమాతో హీరోగా ఎంట్రీ ఇస్తున్నాడు. శ్రీలీల ఫీమేల్ లీడ్‌లో నటిస్తోంది.

తెలుగు డైరెక్టర్ రాధాకృష్ణ ఈ చిత్రాన్ని తెరకెక్కిస్తుండగా, వరాహి చలన చిత్రం బ్యానర్‌పై రాజిని కొర్రపాటి నిర్మిస్తున్నారు. సంగీతం దేవిశ్రీ ప్రసాద్, సినిమాటోగ్రఫీ “బాహుబలి” ఫేమ్ సెంథిల్ కుమార్. “బొమ్మరిల్లు” ఫేమ్ జెనీలియా కీలక పాత్రలో నటిస్తోంది. కన్నడ భాషలో రూపొందినప్పటికీ, ఈ సినిమా తెలుగు స్టైల్లోనే తెరకెక్కింది.

హరిహర వీర మల్లు – జులై 24

జులైలో అత్యంత ఆసక్తిగా ఎదురుచూస్తున్న భారీ సినిమా ఏదైనా ఉందంటే అది పవన్ కళ్యాణ్ నటించిన “హరిహర వీర మల్లు”. దాదాపు నాలుగేళ్లుగా నిర్మాణంలో ఉన్న ఈ చిత్రం, క్రిష్ నుంచి జ్యోతి కృష్ణకి డైరెక్టర్ మార్పు, పలు వాయిదాలను ఎదుర్కొంది. అయినప్పటికీ, పవన్ కళ్యాణ్ ఉన్నాడు. కాబట్టి ఈ సినిమా రిలీజ్ అయినప్పుడు భారీ క్రేజ్ సృష్టించనుంది.

ఈ సినిమా ఆంధ్రప్రదేశ్ డిప్యూటీ సీఎం హోదాలో పవన్ కళ్యాణ్ నటించిన తొలి చిత్రం కావడం విశేషం. మొఘల్ యుగంలో సెట్ చేయబడిన ఈ సినిమా, చక్రవర్తి ఔరంగజేబ్‌కు వ్యతిరేకంగా తిరుగుబాటు చేసే వీరమల్లు కథ చుట్టూ తిరుగుతుంది. పవన్ కళ్యాణ్ ప్రస్తుతం సనాతన ధర్మంపై రాజకీయ స్టాండ్‌తో ఈ కథాంశం దేశవ్యాప్తంగా ప్రేక్షకులను ఆకర్షించే అవకాశం ఉంది.

ఇటీవలి బ్లాక్‌బస్టర్ “ఛావా” తర్వాత ఔరంగజేబ్ డార్క్ సైడ్‌ని చూపించే రెండో సినిమా ఇది. ఔరంగజేబ్‌గా బాబీ డియోల్ నటిస్తున్నాడు. నిధి అగర్వాల్ ఫీమేల్ లీడ్‌లో నటిస్తుండగా, ఆస్కార్ విన్నర్ ఎమ్.ఎమ్. కీరవాణి తొలిసారిగా పవన్ సినిమాకు సంగీతం అందిస్తున్నారు. జులైలో చివరి బిగ్ రిలీజ్‌గా “హరి హర వీర మల్లు” భారీ బాక్సాఫీస్ కలెక్షన్స్‌తో నెలను ముగించే అవకాశం ఉంది.