‘మాస్ జాతర’ రిలీజ్ అప్డేట్ వచ్చేది అప్పుడే !

మాస్ మహారాజా రవితేజ నటించిన “మాస్ జాతర” సినిమా చాలాసార్లు వాయిదా పడడంతో ప్రేక్షకులు ఆసక్తి కోల్పోయారు. ఈ సినిమా గురించి నిర్మాతలు కూడా మరిచిపోయారేమో అని చాలామంది అనుకున్నారు. అయితే, నిర్మాత నాగ వంశీ మాత్రం ఈ సినిమా విడుదల గురించి ప్రణాళికలు సిద్ధంగా ఉన్నాయని, దసరా పండుగ సందర్భంగా వాటిని ప్రకటిస్తామని స్పష్టం చేశారు.

రవితేజ పోలీస్ అధికారిగా, శ్రీలీల కాలేజీ విద్యార్థినిగా నటించిన ఈ చిత్రం వాస్తవానికి మే 2025న విడుదల కావాల్సి ఉంది. ఆ తర్వాత ఆగస్టు 27కి వాయిదా పడింది, కానీ మళ్ళీ వాయిదా పడింది. నిర్మాత నాగ వంశీ సోషల్ మీడియాలో ఒక అభిమాని అడిగిన ప్రశ్నకు బదులిస్తూ.. దసరా పండుగ సందర్భంగా అక్టోబర్ 2న సినిమా విడుదల తేదీని అధికారికంగా ప్రకటిస్తామని, ఆ తర్వాత వరుసగా ప్రచార కార్యక్రమాలు ఉంటాయని వివరించారు.

రచయిత-దర్శకుడు భాను రూపొందించిన “మాస్ జాతర” రవితేజకు చాలా ముఖ్యమైన చిత్రం. ఈ మధ్య కాలంలో ఆయనకు చెప్పుకోదగ్గ విజయం లేదు. పోలీస్ పాత్రలు ఆయనకు కెరీర్‌లో కొన్ని పెద్ద విజయాలను అందించాయి కాబట్టి, ఈ పోలీస్ డ్రామాపై రవితేజ చాలా ఆశలు పెట్టుకున్నారు.