తెలుగులో రెమ్యూనరేషన్ పెంచేశాడా?

అనిరుద్ కొత్త తెలుగు ప్రాజెక్ట్‌ల కోసం రూ. 15 కోట్లు కోట్ చేస్తున్నాడు.కోలీవుడ్ క్రేజీకంపోజర్ అనిరుద్ రవిచందర్ నిస్సందేహంగా ఈ రోజుల్లో దక్షిణ భారత సినిమా సంగీత రంగంలో అగ్రగామి సంగీత దర్శకుడు. అలాగే అత్యంత బిజీగా ఉండే సంగీత దర్శకుడు. తమిళం, తెలుగు, హిందీలో ఎన్నో హై-ప్రొఫైల్ ప్రాజెక్ట్‌లతో అతను తన హవాను చాటుకుంటున్నాడు. ఇటీవల, అతను తెలుగు సినిమాలపై ఎక్కువ దృష్టి సారిస్తూ.. ఇండస్ట్రీలో తన పరిధిని విస్తరిస్తున్నాడు.

ఎన్టీఆర్ నటించిన “దేవర” సినిమా తర్వాత, అనిరుద్ విజయ్ దేవరకొండ నటిస్తున్న “కింగ్‌డమ్”, నాని, శ్రీకాంత్ ఓదెల కాంబో మూవీ “ది ప్యారడైస్” సినిమాలకు సంతకం చేశాడు. “ది ప్యారడైస్” కోసం అతను రూ. 12 కోట్ల రెమ్యూనరేషన్ తీసుకున్నట్లు సమాచారం. ఇది అతని మునుపటి ఫీజు కంటే రూ. 2 కోట్లు ఎక్కువ.

ఇప్పుడు తాజా టాక్ ఏంటంటే.. అనిరుద్ కొత్త తెలుగు ప్రాజెక్ట్‌ల కోసం రూ. 15 కోట్లు కోట్ చేస్తున్నాడు. తన మ్యూజిక్ రైట్స్ మాత్రమే ఆ మొత్తాన్ని లేదా అంతకంటే ఎక్కువను సంపాదించగలవని, తన అపారమైన పాపులారిటీ ,టాప్ మ్యూజిక్ లేబుల్స్ నుండి వచ్చే డిమాండ్‌ను దృష్టిలో ఉంచుకుని, నిర్మాతలకు హామీ ఇస్తున్నాడు.

తమిళంలో “జైలర్ 2”, “జన నాయగన్” వంటి పెద్ద సినిమాలతో పాటు, బాలీవుడ్‌లో షారుఖ్ ఖాన్ నటిస్తున్న “కింగ్” వంటి ప్రాజెక్ట్‌లపై కొనసాగుతూనే, అనిరుద్ తెలుగు సినిమాలను ఎంపిక చేసుకుంటూ, అధిక ధరకే సంతకం చేస్తున్నాడు. అతడి పెరుగుతున్న డిమాండ్... పాన్-ఇండియా అప్పీల్ చార్ట్‌బస్టర్ ట్రాక్ రికార్డ్‌ను స్పష్టంగా తెలియజేస్తోంది.