‘బిల్లా రంగ బాషా’ గా కిచ్చా సుదీప్

‘మాక్స్’ సినిమాతో ప్రేక్షకులను అలరించిన కిచ్చా సుదీప్.. తన తదుపరి భారీ ప్రాజెక్ట్‌పై దృష్టి పెట్టాడు. ప్రస్తుతం సెలబ్రిటీ క్రికెట్ లీగ్ లో పాల్గొంటూ బిజీగా ఉన్నా.. త్వరలో కొత్త సినిమాను ప్రారంభించబోతున్నట్టు ఇటీవల సోషల్ మీడియా ద్వారా ప్రకటించాడు. ఆ సినిమా పేరు ‘బిల్లా రంగ బాషా’. ఈ చిత్రం షూటింగ్ మార్చి రెండో వారం నుండి ప్రారంభమవుతుందని ఆయన వెల్లడించాడు. ఈ వార్త అభిమానులను ఆనందంలో ముంచేసింది.

‘విక్రాంత్ రోణ’ తర్వాత.. దర్శకుడు అనూప్ భండారితో సుదీప్ మరోసారి చేతులు కలుపుతున్నాడు. ఈ సినిమా కథ రెండు శతాబ్దాల తరువాత భవిష్యత్తు నేపథ్యంలో సాగుతుందని సమాచారం. దీన్ని రెండు భాగాలుగా రూపొందించనున్నారు. చిత్ర బృందం ప్రత్యేక సెట్లను నిర్మించేందుకు బెంగళూరు శివారులో నాలుగు ఎకరాల భూమిని లీజుకు తీసుకుంది. ‘హను-మాన్’ వంటి విజయవంతమైన సినిమాలను నిర్మించిన ప్రైమ్‌షో ఎంటర్టైన్‌మెంట్ సంస్థ ఈ చిత్రాన్ని నిర్మిస్తోంది. అలాగే కిచ్చా క్రియేషన్స్ కూడా భాగస్వామ్యం కానుంది.

దర్శకుడు అనూప్ భండారి ప్రాజెక్ట్ స్థాయిని వివరిస్తూ, వీఎఫ్ ఎక్స్, త్రీడీ సెట్లకు భారీ ప్రణాళికలు వేశామని తెలిపారు. ఈ సినిమా త్రీడీ, టూడీ ఫార్మాట్లలో విడుదల కానుండడంతో.. ప్రేక్షకులకు అద్భుతమైన విజువల్ అనుభూతిని అందించనుంది. ప్రధాన తారాగణం దాదాపుగా ఖరారై, త్వరలో మరికొంతమంది నటీనటులు జతకానున్నారు. నిరంతరంగా 20-25 రోజుల పాటు చిత్రీకరణ కొనసాగించనున్నారు. కొత్త సెట్లు ఒకదాని వెంట మరొకటి సిద్ధం అవుతూనే ఉంటాయి. మిగిలిన సాంకేతిక వివరాలు, తారాగణాన్ని త్వరలో అధికారికంగా ప్రకటించనున్నారు.