టీడీపీ అబ్బాయితో జనసేన అమ్మాయి!
బుల్లితెర నటుడు, బిగ్‌బాస్ ఫేమ్ అమర్ దీప్ చౌదరి హీరోగా, సీనియర్ నటి సురేఖ వాణి కుమార్తె సుప్రితా నాయుడు కథానాయికగా నటిస్తున్న కొత్త సినిమా 'చౌదరి గారి అబ్బాయితో నాయుడు గారి అమ్మాయి'. ఈ టైటిల్ ను లేటెస్ట్ గా అనౌన్స్ చేశారు. ఎం3 మీడియా బ్యానర్ పై మహేంద్రనాథ్ కూండ్ల నిర్మిస్తున్న ఈ చిత్రానికి మాల్యాద్రి రెడ్డి దర్శకత్వం వహిస్తున్నారు.
ఈ టైటిల్ ప్రకటనతో పాటు గ్లింప్స్‌ను మీడియా సమక్షంలో విడుదల చేశారు. అయితే, ఈ ఈవెంట్ నాటకీయతలకు తక్కువగా లేదు. టైటిల్ కులాల పేర్లతో పెట్టడం గమనార్హం. కథకు సంబంధం లేకపోయినా, ప్రేక్షకుల దృష్టిని ఆకర్షించేందుకే ఈ టైటిల్ పెట్టామని నిర్మాత స్పష్టంగా చెప్పారు. 'టీడీపీ, జనసేన కూటమి వచ్చిన ఈ టైమ్‌లో, అదే కులాలకు చెందిన హీరో, హీరోయిన్ ఉన్న సినిమాకు ఈ టైటిల్ పెట్టడంలో తప్పేముంది?' అంటూ ఆయన తేలిగ్గా స్పందించారు.
ఈ సందర్భంగా సురేఖ వాణి, తన ఇన్‌స్టాగ్రామ్‌లో టైటిల్‌ను షేర్ చేసి వచ్చిన కామెంట్‌లను చదివి... స్టేజ్‌పై హంగామా సృష్టించారు. సోషల్ మీడియాలో ఓ కామెంట్‌ను చదవాలా వద్దా అన్న దానిపై హీరో అమర్ దీప్, నిర్మాత, సుప్రితా మధ్య ఓ చిన్న చర్చ జరిగింది. చివరికి 'టీడీపీ అబ్బాయితో జనసేన అమ్మాయి' అన్న కామెంట్‌ వైరల్‌ అయింది. దాన్ని అమర్ దీప్ కూడా పరోక్షంగా అంగీకరించాడు.
తాజాగా విడుదలైన గ్లింప్స్‌లో విజువల్స్ ఆకట్టుకునేలా ఉన్నాయి. హీరోయిన్ సుప్రిత మాట్లాడుతూ, 'ఇది నా తొలి చిత్రం. మొదట భయం ఉన్నా... టీమ్ నుంచి మంచి సపోర్ట్ లభించింది' అని చెప్పింది. అమర్ దీప్ మాట్లాడుతూ, 'ఇది నా తొలి సినిమా టైటిల్ గానూ ఎంతో ప్రత్యేకం. బిగ్‌బాస్ నుంచి బయటకు వచ్చాక మంచి ప్రాజెక్ట్‌తో వస్తేనే బాగుంటుందని ప్లాన్ చేశాం. ఇది మంచి సినిమా అవుతుంది' అన్నాడు. టైటిల్ తో అందరి అటెన్షన్ సంపాదించిన ఈ చిత్రం ప్రేక్షకుల్లో ఎంత వరకు ఆకర్షణ తెచ్చుకుంటుందో చూడాల్సిందే.