శివాజీ గణేశన్ ఆస్తి స్వాధీనం చేసుకునేందుకు మద్రాస్ హైకోర్టు ఆదేశం!

పాత బకాయిలను తిరిగి పొందడంలో అప్పిచ్చిన కంపెనీలు తీవ్ర చర్యలు తీసుకోవడం మనం తరచుగా చూస్తుంటాం. తమిళ సినీ దిగ్గజం శివాజీ గణేషన్‌కు సంబంధించిన ఒక ఆస్తిని స్వాధీనం చేసుకునేందుకు మద్రాస్ హైకోర్టు తాజాగా ఆదేశాలు జారీ చేయడం ఇప్పుడు చర్చనీయాంశంగా మారింది. తాజా సమాచారం ప్రకారం, ఈ సమస్య ఈసన్ ప్రొడక్షన్ కంపెనీ ద్వారా ఏర్పడింది. ఈ సంస్థను శివాజీ గణేషన్ మనవడు దుశ్యంత్, ఆయన భార్య అభిరామి నిర్వహిస్తున్నారు. ఈ ప్రొడక్షన్ కంపెనీ ధనభాగ్యం ఎంటర్‌ప్రైజెస్ అనే సంస్థ నుంచి రూ.3.74 కోట్ల రుణాన్ని తీసుకుంది. అయితే, ఈ రుణానికి వార్షికంగా 30% వడ్డీ ఒప్పుకున్నారు.

కానీ ఈ రుణాన్ని ప్రొడక్షన్ సంస్థ తిరిగి చెల్లించలేదు. దాంతో, అప్పు ఇచ్చిన వ్యక్తి న్యాయపరమైన చర్యలు ప్రారంభించి మద్రాస్ హైకోర్టును ఆశ్రయించాడు. ఈ కేసును మద్రాస్ హైకోర్టు పరిశీలించేందుకు సుప్రీం కోర్టు మాజీ న్యాయమూర్తి టి.రవీంద్రన్ ను నియమించింది. ఆయన చేపట్టిన ప్రాథమిక విచారణలో అప్పుదారుకు న్యాయసమ్మతమైన పరిహారం లభించాల్సిన అవసరం ఉందని తేలింది. ఆలస్యంగా చెల్లించకపోవడంతో మొత్తం బకాయి రూ. 9 కోట్లకు పైగా పెరిగింది.

దీంతో, కోర్టు శివాజీ గణేషన్‌కు చెందిన ఆస్తిని స్వాధీనం చేసుకోవాలని ఆదేశించింది. ఈ ఆస్తి చెన్నైలో ఉంది. అప్పును తక్షణమే తీర్చకపోతే, ఈ ఆస్తిని వేలానికి పెట్టే అవకాశం ఉంది. ఇప్పటి వరకు ఈ వ్యవహారంపై సంబంధిత వ్యక్తులు ఎవరూ అధికారిక ప్రకటన విడుదల చేయలేదు. శివాజీ గణేషన్ కుటుంబానికి చెందిన ప్రొడక్షన్ హౌస్ తీసుకున్న రుణం కారణంగా ఈ పరిణామం చోటుచేసుకోవడం సినీ పరిశ్రమలో హాట్ టాపిక్‌గా మారింది. ఈ కేసు ఫైనల్ సెటిల్‌మెంట్ ఎలా జరుగుతుందో చూడాలి.