బోల్డ్‌ సన్నివేశాలు తప్పనిసరికాదు : కరీనాకపూర్
సినిమా కథనాన్ని ముందుకు తీసుకెళ్లడంలో బోల్డ్‌ సన్నివేశాలు తప్పనిసరి కాదని భావిస్తున్నట్లు బాలీవుడ్‌ సీనియర్‌ నటి కరీనా కపూర్‌ వెల్లడించింది. మూడు దశాబ్దాల కాలంలో అనేక విజయవంతమైన సినిమాల్లో నటించిన ఆమె.. గతేడాది ‘క్రూ’, ‘సింగమ్‌ అగైన్‌’ చిత్రాలతో ప్రేక్షకులను పలకరించింది. తాజాగా ఓ ఇంటర్వ్యూలో పాల్గొన్న కరీనా.. బోల్డ్‌ సన్నివేశాలపై తన అభిప్రాయాన్ని వెల్లడిస్తూ.. "నా నటజీవితంలో నేను ఎప్పుడూ పూర్తిగా బోల్డ్‌ పాత్రలు చేయలేదు. అలాంటి సన్నివేశాల్లో నటించడం నాకు సౌకర్యంగా అనిపించదు. సినిమా కోసం అవి తప్పనిసరి అయినప్పుడు మాత్రమే తీసుకురావాలి. కేవలం ప్రేక్షకులను ఆకర్షించడానికి బోల్డ్‌ కంటెంట్‌ను జొప్పించడం సరైనది కాదు" అని తెలిపింది.
పాశ్చాత్య దేశాల్లో మహిళా ప్రాధాన్య చిత్రాలు ఎక్కువగా వస్తాయని, వాటిలో ఇంటిమసీ సన్నివేశాలు ఉంటాయని కరీనా గుర్తు చేసింది. అయితే, భారతీయ చిత్రపరిశ్రమ సంస్కృతి, సంప్రదాయాలను గౌరవిస్తూ అలాంటి అంశాలను మరింత సంప్రదాయబద్ధంగా చూపించేందుకు ఆసక్తి చూపిస్తుందని ఆమె అభిప్రాయపడింది.
సినిమా అనేది వినోదానికి మాత్రమే కాదు, ఒక కథను సరైన విధంగా అందించేందుకు ఉపయోగపడాలి. కేవలం సంచలనంగా మారడానికి కాకుండా, కథలో సహజంగా భాగమైనప్పుడు మాత్రమే ఇలాంటి సన్నివేశాలు అవసరమన్న కరీనా అభిప్రాయం అందరిలోనూ చర్చకు దారి తీస్తోంది.