సూపర్ హీరో సినిమాను ప్రకటించిన ఆమిర్ ఖాన్

బాలీవుడ్ సూపర్‌స్టార్ అమీర్ ఖాన్ తన రాబోయే ప్రాజెక్ట్‌ల గురించి సంచలన విశేషాలను వెల్లడించాడు. ప్రస్తుతం ఆయన పలు స్క్రిప్ట్‌లపై పని చేస్తూ, దాదాపు పది సినిమాలను లైన్‌లో పెట్టాడు. ఈ క్రమంలో, ఒక భారీ సూపర్‌హీరో సినిమాకు సైన్ చేసినట్లు ఆయన ఈ రోజు అధికారికంగా ప్రకటించాడు. ఈ సినిమా అత్యంత ఖరీదైన బడ్జెట్‌తో, గ్రాండ్ స్కేల్‌లో తెరకెక్కనుంది. ఈ ప్రాజెక్ట్‌కు కోలీవుడ్ క్రేజీ డైరెక్టర్ లోకేష్ కనగరాజ్ దర్శకత్వం వహించనున్నాడు. ఈ చిత్రం షూటింగ్ 2026 మధ్యలో ప్రారంభం కానుందని అమీర్ తెలిపాడు.

ముంబైలో తన తాజా చిత్రం ‘సితారే జమీన్ పర్’ సందర్భంగా జరిగిన మీడియా సమావేశంలో అమీర్ ఖాన్ ఈ విషయాలను వెల్లడించాడు. అంతేకాదు, సూపర్‌స్టార్ రజనీకాంత్ నటిస్తున్న లోకేష్ కనగరాజ్ దర్శకత్వంలో రూపొందుతున్న ‘కూలీ’ సినిమాలో తాను ఒక చిన్న క్యామియో రోల్‌లో కనిపించనున్నట్లు కూడా ఆయన ప్రకటించాడు. ఈ వార్త అభిమానుల్లో ఉత్సాహాన్ని నింపింది.

లోకేష్ కనగరాజ్ తమిళ సినిమా పరిశ్రమలో ‘ఖైదీ, మాస్టర్’, ‘విక్రమ్’ వంటి బ్లాక్‌బస్టర్ చిత్రాలతో అగ్రస్థానంలో నిలిచాడు. ఈ చిత్రాలు ఆయనకు కేవలం తమిళంలోనే కాకుండా, భారతీయ సినిమా పరిశ్రమలోనూ భారీ గుర్తింపును తెచ్చిపెట్టాయి. ప్రస్తుతం లోకేష్ డిమాండ్‌లో ఉన్న దర్శకుడిగా మారాడు. ఆయన ఖాతాలో ఇప్పటికే చాలా ప్రాజెక్ట్‌లు లైన్‌లో ఉన్నాయి. అమీర్ ఖాన్‌తో సూపర్‌హీరో సినిమా ఒక కొత్త మైలురాయిగా నిలవనుంది. ఈ సినిమా గురించి మరిన్ని వివరాలను త్వరలో నిర్మాతలు అధికారికంగా ప్రకటిస్తారని అమీర్ సూచనగా తెలిపాడు.