"థగ్ లైఫ్" రివ్యూ

తారాగణం: కమల్ హాసన్, సిలంబరసన్ TR, త్రిష, ఐశ్వర్య లక్ష్మి, అశోక్ సెల్వన్, అభిరామి, జోజు జార్జ్, నాజర్, మహేష్ మంజ్రేకర్ మరియు అలీ ఫజల్

డైరెక్టర్ ఆఫ్ ఫోటోగ్రఫీ: రవి కె. చంద్రన్

ఎడిటర్: శ్రీకర్ ప్రసాద్

యాక్షన్: అన్బరివ్

మ్యూజిక్: a r రెహమాన్

బ్యానర్: రాజ్ కమల్ ఫిల్మ్స్ ఇంటర్నేషనల్ & మద్రాస్ టాకీస్

డైరెక్టర్: మణిరత్నం

‘థగ్ లైఫ్’.. కమల్ హాసన్ హీరోగా, మణిరత్నం దర్శకత్వంలో రూపొందిన హై-ఆక్టేన్ గ్యాంగ్‌స్టర్ డ్రామా. 38 ఏళ్ల తర్వాత కమల్ హాసన్, మణిరత్నం కలిసి చేసిన చిత్రం కావడంతో ఈ సినిమాపై భారీ అంచనాలు నెలకొన్నాయి. శింబు, త్రిష, అభిరామి, నాజర్ వంటి నటీనటులు కీలక పాత్రల్లో నటించారు. ఏ.ఆర్. రెహమాన్ సంగీతం, రవి కె. చంద్రన్ సినిమాటోగ్రఫీ, శ్రీకర్ ప్రసాద్ ఎడిటింగ్‌తో ఈ చిత్రం టెక్నికల్‌గా బలంగా ఉందని ప్రచారం జరిగింది. ఈరోజు థియేటర్లలో విడుదలైన ఈ సినిమా ఎలా ఉందో వివరంగా చూద్దాం.

కథ:

‘థగ్ లైఫ్’ ఒక గ్యాంగ్‌స్టర్ నేపథ్యంలో సాగే కథ. రంగరాయ శక్తి రాజు (కమల్ హాసన్) ఒక శక్తివంతమైన గ్యాంగ్‌స్టర్‌గా కనిపిస్తాడు, అతడి జీవితంలోకి అనాధ అయిన అమర్ (శింబు) ప్రవేశిస్తాడు. శక్తి.. అమర్ ను పెంచి పెద్దగా చేస్తాడు. కానీ అనుకోకుండా వీరిద్దరి మధ్య శత్రుత్వం ఏర్పడుతుంది. ఈ శత్రుత్వం, గ్యాంగ్‌ల మధ్య పోటీలు, ఎమోషనల్ డ్రామా, యాక్షన్ సన్నివేశాలతో కథ సాగుతుంది. ఈ కథలో ఎవరు గెలుస్తారు? శక్తి, అమర్ మధ్య గొడవ ఎలా ముగుస్తుంది? అనేది తెరపై చూడాలి.

విశ్లేషణ:

ఈ సినిమా వివాదాల మధ్య విడుదలైంది, ముఖ్యంగా కర్ణాటకలో కొన్ని చట్టపరమైన సమస్యలు ఎదురయ్యాయి. అయినప్పటికీ భారీ స్థాయిలో ప్రపంచవ్యాప్తంగా ఈ సినిమా విడుదలైంది.

మణిరత్నం ఈ చిత్రంలో తనదైన ముద్ర వేయడానికి ప్రయత్నించారు. గ్యాంగ్‌స్టర్ డ్రామాకు తగ్గట్టు ఇంటెన్స్ సన్నివేశాలు, ఎమోషనల్ మూమెంట్స్‌ను రూపొందించారు. అయితే, కథనం కొంత స్లోగా సాగడం, రొటీన్ స్టోరీలైన్ వల్ల సినిమా మణిరత్నం లాంటి దర్శకుడి నుంచి ఆశించిన స్థాయిలో లేదని చెప్పాలి.

కమల్ హాసన్, శింబు నటన. ఏ.ఆర్. రెహమాన్ బ్యాక్‌గ్రౌండ్ స్కోర్. ఫస్ట్ హాఫ్‌లో ఆసక్తికరమైన గ్యాంగ్‌స్టర్ సెటప్. హై-క్వాలిటీ ప్రొడక్షన్ వాల్యూస్, విజువల్స్ ఈ సినిమాకి ప్లస్ పాయింట్స్.

రొటీన్ స్టోరీ, ఊహించదగిన స్టోరీలైన్. సెకండ్ హాఫ్‌లో స్లో నేరేషన్, డ్రాగ్ అయిన సన్నివేశాలు. త్రిష వంటి కొన్ని పాత్రలు అండర్‌యూటిలైజ్ అయ్యాయి. మణిరత్నం గత చిత్రాల స్థాయిలో ఈ మూవీ లేదని చెప్పాలి.

నటీనటులు, సాంకేతిక నిపుణులు

ఈ సినిమాలో కమల్ హాసన్ నటన హైలైట్. గ్యాంగ్‌స్టర్‌గా ఇంటెన్స్ క్యారెక్టర్ లో, ఎమోషనల్ సీన్స్ లో కమల్ నటన బాగుంది. శింబు కూడా తన పాత్రలో మంచి నటన కనబరిచాడు, కానీ అతడి పాత్ర స్క్రీన్ టైం తక్కువగా ఉండటంతో అతడి నటన పూర్తిగా వినియోగించబడలేదని చెప్పొచ్చు.

త్రిష పాత్ర కథలో అంతగా ప్రాధాన్యత లేనట్లు అనిపిస్తుంది. అభిరామి, నాజర్ వంటి సహాయక నటులు తమ పాత్రల్లో ఆకట్టుకున్నారు. ముఖ్యంగా నాజర్ నటన చాలా సహజంగా ఉంది.

ఏ.ఆర్. రెహమాన్ అందించిన సంగీతం, బ్యాక్‌గ్రౌండ్ స్కోర్ విషయానికొస్తే.. రెహమాన్ బిజిఎం కొన్ని సన్నివేశాలను ఎలివేట్ చేసినప్పటికీ, ఆయన సంగీతం గత చిత్రాల స్థాయిలో లేదు.

రవి కె. చంద్రన్ సినిమాటోగ్రఫీ సినిమాకు గ్రాండ్ లుక్‌ను తీసుకొచ్చింది. యాక్షన్ సీక్వెన్స్‌లు, గ్యాంగ్‌స్టర్ లొకేషన్స్ విజువల్‌గా ఆకట్టుకున్నాయి. శ్రీకర్ ప్రసాద్ ఎడిటింగ్ సమర్థవంతంగా ఉన్నప్పటికీ, సెకండ్ హాఫ్‌లో కొన్ని సన్నివేశాలు డ్రాగ్ అయినట్లు అనిపించాయి.

చివరగా:

‘థగ్ లైఫ్’ కమల్ హాసన్ అభిమానులకు, గ్యాంగ్‌స్టర్ డ్రామాలు ఇష్టపడే వారికి ఒక డీసెంట్ వాచ్.