ఓటీటీ లోకి 'టూరిస్ట్ ఫ్యామిలీ'!

తమిళ సినిమా పరిశ్రమలో ఇటీవల కాలంలో చిన్న బడ్జెట్ చిత్రాలు బాక్సాఫీస్ వద్ద ఊహించని విజయాలు సాధిస్తున్నాయి. అలాంటి సినిమాల్లో ఒకటిగా నిలిచింది 'టూరిస్ట్ ఫ్యామిలీ'. శశి కుమార్, సిమ్రాన్ ప్రధాన పాత్రల్లో అభిషన్ జీవింత్ తెరకెక్కించిన ఈ చిత్రం, మానవతా విలువలు హృదయాన్ని స్పృశించే కాన్సెప్ట్ తో తెరకెక్కింది.

'టూరిస్ట్ ఫ్యామిలీ' కథ శ్రీలంకలో ఆర్థిక సంక్షోభం నేపథ్యంలో ఒక తమిళ మధ్యతరగతి కుటుంబం ఎదుర్కొన్న సవాళ్ల చుట్టూ తిరుగుతుంది. ఈ కుటుంబం భారతదేశంలో చెన్నైలో కొత్త జీవితాన్ని ప్రారంభించేందుకు ప్రయత్నిస్తుంది, కానీ వారి గుర్తింపును దాచిపెట్టాల్సిన పరిస్థితి ఏర్పడుతుంది. ఈ క్రమంలో రామేశ్వరం సమీపంలో జరిగిన బాంబ్ బ్లాస్ట్ ఘటన వారి జీవితాలను మరింత సంక్లిష్టం చేస్తుంది. పోలీసుల దర్యాప్తు, ఈ కుటుంబం ఎదుర్కొన్న సమస్యలు, మరియు వారి జీవితంలో మానవతా విలువలు ఎలా ప్రకాశిస్తాయి అనే అంశాలు ఈ చిత్రంలో ఆసక్తికరంగా చూపించారు. సీనియర్ నటులు శశి కుమార్, సిమ్రాన్ లతో పాటు కమెడియన్ యోగి బాబు నటన ఈ చిత్రానికి ప్రాణం పోసింది.

చిన్న సినిమాగా థియేటర్లలో విడుదలైన ఈ చిత్రం భారీ విజయాన్ని సాధించింది. ఇప్పటికే 'టూరిస్ట్ ఫ్యామిలీ'కి దర్శకధీరుడు రాజమౌళి మొదలుకొని చాలామంది సెలబ్రిటీల నుంచి ప్రశంసల వర్షం కురిచింది. లేటెస్ట్ గా ఈ చిత్రం ఓటీటీలోకి అందుబాటులోకి వస్తోంది. జూన్ 2 నుంచి జియో హాట్ స్టార్ లో 'టూరిస్ట్ ఫ్యామిలీ' స్ట్రీమింగ్ కానుంది.