బాలీవుడ్ లో ఈ ఇద్దరికీ నిరాశ తప్పలేదు

ఈ వీకెండ్‌లో బాలీవుడ్‌లో రెండు క్రేజీ హిందీ మూవీస్.. “ధడక్ 2” మరియు “సన్ ఆఫ్ సర్దార్ 2” థియేటర్స్ లో సందడి చేశాయి. ఈ రెండు సినిమాల్లో ఒకటి “యానిమల్” ఫేమ్ త్రిప్తి డిమ్రీ లీడ్‌లో రాగా, మరో సినిమాలో బాలీవుడ్ మరో టాలెంటెడ్ హీరోయిన్ మృణాల్ ఠాకూర్ నటించింది. ఈ రెండు సినిమాలు భారీ అంచనాలతో రిలీజ్ అయినప్పటికీ, బాక్సాఫీస్ వద్ద ఆశించిన రీతిలో రాణించలేకపోయాయి. ఇది సినీ వర్గాల్లో చర్చనీయాంశంగా మారింది.

“సన్ ఆఫ్ సర్దార్ 2” ఒక భారీ రిలీజ్‌గా భావించబడింది. ఈ సినిమాకు బాలీవుడ్ స్టార్ అజయ్ దేవగణ్ బ్యాకింగ్ ఉంది. అంతేకాదు ఇది 2012లో విడుదలైన హిట్ కామెడీ-యాక్షన్ మూవీ “సన్ ఆఫ్ సర్దార్”కి సీక్వెల్‌గా వచ్చింది. అయినప్పటికీ, ఈ సినిమా బాక్సాఫీస్ వద్ద ఆశించిన స్థాయిలో సందడి చేయలేకపోయింది. తొలి రెండు రోజుల్లో ఇండియా వైడ్ కేవలం 14 కోట్ల రూపాయలు మాత్రమే కలెక్ట్ చేసింది. ఈ సినిమా మృణాల్ ఠాకూర్ బాలీవుడ్‌లో స్టార్‌డమ్‌ని పరీక్షించే కీలకమైన ప్రాజెక్ట్‌గా మారింది. కానీ ఈ ఫలితాలు ఆమె క్రేజ్‌పై ప్రశ్నలు లేవనెత్తాయి.

మరోవైపు.. “ధడక్ 2” సినిమా త్రిప్తి దిమ్రీ ఖాతాలో చేరింది. “యానిమల్” సినిమా సూపర్ సక్సెస్ తర్వాత త్రిప్తి దిమ్రీ బాలీవుడ్‌లో కొత్త స్టార్‌గా గుర్తింపు పొందింది. ఆమె క్రేజ్ ఈ సినిమాకి భారీ ఓపెనింగ్‌ని తెచ్చిపెడుతుందని అందరూ భావించారు. ముఖ్యంగా “ధడక్ 2” సూపర్ హిట్ “ధడక్” ఫ్రాంచైజీలో భాగమైన సినిమా. అయితే, ఈ సినిమా కూడా బాక్సాఫీస్ వద్ద నీరసంగా ఆరంభమైంది. తొలి రెండు రోజుల్లో కేవలం 6 కోట్ల రూపాయలు మాత్రమే వసూలు చేసింది. ఈ ఫలితాలు త్రిప్తి దిమ్రీ ఒక్కరి స్టార్‌డమ్ సినిమాని గట్టెక్కించలేదని సూచిస్తున్నాయి.

ఈ రెండు సినిమాలు బాక్సాఫీస్ వద్ద ఆశించిన స్థాయిలో రాణించకపోవడం వల్ల త్రిప్తి దిమ్రీ, మృణాల్ ఠాకూర్ ఇద్దరూ తమ లేటెస్ట్ ప్రాజెక్ట్స్‌తో నిరాశపరిచారని చెప్పాలి. మొత్తానికి ఈ ఫలితాలు బాలీవుడ్‌లో స్టార్‌డమ్, కంటెంట్, మార్కెట్ డైనమిక్స్‌పై మరింత చర్చలకు దారితీసే అవకాశం ఉంది.