శ్రీతేజ్ ను పరామర్శించిన అల్లు అరవింద్

‘పుష్ప 2‘ ప్రీమియర్ షో సందర్భంగా సంధ్య థియేటర్లో జరిగిన తొక్కిసలాటలో తీవ్రంగా గాయపడ్డ శ్రీతేజ్ ను ప్రముఖ నిర్మాత అల్లు అరవింద్ సందర్శించారు. శ్రీతేజ్ ఆరోగ్య పరిస్థితిని తెలుసుకునేందుకు ఆయనకు చికిత్సను అందిస్తున్న రీహాబిలిటేషన్ సెంటర్‌ను సందర్శించారు.

వైద్యులు అందించిన సమాచారం ప్రకారం, శ్రీతేజ్ ఆరోగ్యం రోజురోజుకు మెరుగుపడుతోందని, అతను క్రమంగా కోలుకుంటున్నాడని అరవింద్ తెలిపారు. ‘శ్రీతేజ్ త్వరలో పూర్తిగా కోలుకుని, సాధారణ బాలుడిలా మనందరి మధ్య సంతోషంగా ఉంటాడని మా కుటుంబం ఆశిస్తోంది. అతని పురోగతి మాకు సంతోషాన్ని ఇస్తోంది‘ అని అల్లు అరవింద్ తన ఆశాభావాన్ని వ్యక్తం చేశారు.

శ్రీతేజ్ చికిత్సకు అల్లు కుటుంబం ఆర్థిక సహాయం అందిస్తోంది. అల్లు అర్జున్, పుష్ప చిత్ర యూనిట్ సహకారంతో ఇప్పటికే శ్రీతేజ్ చికిత్స కోసం 2 కోట్ల రూపాయలను అతని ఖాతాలో జమ చేశారు. ఈ సహాయం శ్రీతేజ్‌కు అత్యాధునిక వైద్య సౌకర్యాలు అందుబాటులోకి రావడానికి, అతని చికిత్స సాఫీగా సాగడానికి ఎంతగానో ఉపయోగపడుతోంది. వైద్యులు కూడా శ్రీతేజ్ చికిత్సకు సహకరిస్తున్నారని తెలిపారు.