‘ప్రావిన్‌కూడు షాప్పు’ మూవీ రివ్యూ
చిత్రం : ‘ప్రావిన్ కూడు షాప్పు’
విడుదల తేదీ: ఏప్రిల్ 11, 2025 ( ఓటీటీ - సోనీ లివ్)
నటీనటులు: బాసిల్ జోసెఫ్, సౌబిన్ షాహిర్, చెంబన్ వినోద్ జోస్, చాందినీ శ్రీధరన్, శివజిత్, షబరీష్ వర్మ
సంగీతం: విష్ణు విజయ్
సినిమాటోగ్రఫీ: షైజు ఖాలిద్
ఎడిటింగ్: షఫీక్ ముహమ్మద్ అలీ
నిర్మాత: అన్వర్ రషీద్
జానర్: బ్లాక్ కామెడీ, క్రైమ్ థ్రిల్లర్
రన్‌టైమ్: సుమారు 2 గంటల 20 నిమిషాలు
దర్శకుడు: శ్రీరాజ్ శ్రీనివాసన్
ఓటీటీ ద్వారా తెలుగు ప్రేక్షకులకు బాగా దగ్గరైన మలయాళ హీరో బేసిల్ జోసెఫ్ ఈ సారి పోలీసు పాత్రలో ఒక క్రైమ్ థ్రిల్లర్ తో డిజిటల్ ఆడియన్స్ ముందుకు వచ్చేశాడు. ఆ సినిమా పేరు ‘ప్రావిన్ కూడు షాప్పు’. ఒక మర్డర్ ఇన్వెస్టిగేషన్ కథతో రూపొందిన ఈ సినిమాకు శ్రీరాజ్ శ్రీనివాసన్ దర్శకుడు. సోనీ లివ్ లో తెలుగులో కూడా అందుబాటులోకి వచ్చిన ఈ సినిమా ఏ రేంజ్ లో జనానికి కనెక్ట్ అయింది? ఏ మేరకు మెప్పిస్తుంది? అనే విషయాలు రివ్యూలో చూద్దాం.
కథ
త్రిశూర్‌లోని మాప్రానం అనే గ్రామంలో జరిగే ఈ కథలో, కొంబన్ బాబు (శివజిత్) అనే కల్లు షాప్ యజమాని హత్యకు గురవుతాడు. ఈ హత్య ఒక వర్షపు రాత్రి షాప్ మూసిన తర్వాత జరుగుతుంది. ఆ సమయంలో షాప్‌లో 11 మంది వ్యక్తులు ఉంటారు. వారు తాగుతూ, కార్డులు ఆడుతూ కాలక్షేపం చేస్తారు. ఉదయానికి బాబు శవమై కనిపిస్తాడు, దీంతో అందరూ అనుమానితులుగా మారతారు.
ఈ కేసును ఛేదించేందుకు సబ్-ఇన్‌స్పెక్టర్ సంతోష్ (బేసిల్ జోసెఫ్) రంగంలోకి దిగుతాడు. సంతోష్ సాంప్రదాయ పోలీస్ హీరోలా కాకుండా, తనదైన విధానంలో, వైజ్ఞానిక పద్ధతులతో కేసును పరిష్కరించడానికి ప్రయత్నిస్తాడు. అదే సమయంలో, షాప్‌లో పనిచేసే కన్నన్ (సౌబిన్ షాహిర్), సునీల్ (చెంబన్ వినోద్), మెరిండా (చాందినీ శ్రీధరన్) వంటి పాత్రల చుట్టూ కథ తిరుగుతూ, ఒక్కొక్కరి నేపథ్యం, రహస్యాలు బయటపడతాయి.
కథాకథనాల విశ్లేషణ
‘ప్రావిన్‌కూడు షాప్పు’ సినిమా కథాంశం ఒక కల్లు షాప్‌లో జరిగే హత్య రహస్యం చుట్టూ నాన్-లీనియర్ శైలిలో అల్లుకుంది. షాప్‌లో ఉన్న 11 మంది వ్యక్తులు ఒక్కొక్కరి నేపథ్యం.. రహస్యాలు కథను ముందుకు నడిపిస్తాయి. దర్శకుడు శ్రీరాజ్ శ్రీనివాసన్ ఈ క్రైమ్ థ్రిల్లర్ కథాంశాన్ని తెలివిగా హ్యాండిల్ చేశాడు. సబ్-ఇన్‌స్పెక్టర్ సంతోష్ (బేసిల్ జోసెఫ్) కేసును ఛేదించే ప్రక్రియలో శాస్త్రీయ పద్ధతులను ఉపయోగిస్తాడు, కానీ అతని అతి ఆత్మవిశ్వాసం కథకు హాస్యపు కోణాన్ని జోడిస్తుంది.
నాన్-లీనియర్ కథనం ఫ్లాష్‌బ్యాక్‌ల ద్వారా పాత్రల గతాన్ని వెల్లడిస్తూ.. ఒక్కో ట్విస్ట్‌తో ప్రేక్షకులను ఊహించని మలుపులవైపు నడిపిస్తుంది. ఫస్ట్ హాఫ్‌లో కల్లు షాప్‌లోని సంభాషణలు, స్థానిక యాస, వాతావరణం కలిసి ఒక విచిత్రమైన, ఆకర్షణీయ టోన్‌ను సృష్టిస్తాయి. పాత్రల మధ్య సంఘర్షణలు, అత్యాశ, ద్వేషం, అసూయ, మానవ స్వభావంలోని చీకటి కోణాలను చూపిస్తాయి, ఇవి సినిమాకు లోతైన థీమాటిక్ బలాన్ని అందిస్తాయి.
అయితే, సెకండ్ హాఫ్‌లో కథాకథనం కొంత సాగదీతగా మారుతుంది, ఇది సినిమా ప్రధాన బలహీనత. హత్య రహస్యాన్ని వెల్లడించే ప్రక్రియలో కొన్ని ట్విస్టులు ఆకట్టుకున్నప్పటికీ, క్లైమాక్స్ పూర్తిగా సంతృప్తికరంగా అనిపించదు. కొన్ని సహాయక పాత్రల నేపథ్యాలు (ఉదాహరణకు, షబరీష్ వర్మ, రేవతి) అసంపూర్తిగా మిగిలిపోతాయి, ఇది కథనంలో అసమగ్రతను సృష్టిస్తుంది. స్క్రిప్ట్‌లోని కొన్ని లాజిక్ లోపాలు, అనవసరమైన జంప్ స్కేర్ సౌండ్స్ సినిమా యొక్క థ్రిల్లర్ ఎలిమెంట్స్‌ను బలహీనపరుస్తాయి. అయినప్పటికీ, డైలాగ్స్‌లోని హాస్యం, త్రిశూర్ గ్రామీణ నేపథ్యం, పాత్రల మధ్య సంబంధాలను చూపించే విధానం కథనాన్ని ఆసక్తికరంగా నిలబెడతాయి.
నటీనటుల పెర్ఫార్మెన్స్
సంతోష్ పాత్రలో బేసిల్ అద్భుతంగా చేశాడు. ఒక సాధారణ పోలీస్ ఆఫీసర్‌గా, అతని నార్సిసిజం, కేసు పరిష్కరించాలనే పట్టుదలను చక్కగా పండించాడు. కామెడీ, సీరియస్‌నెస్ మధ్య బ్యాలెన్స్ పాత్రకు లోతు తెచ్చింది.
కన్నన్‌గా సౌబిన్ తన సహజ నటనతో ఆకట్టుకున్నాడు. అతని పాత్రలోని అసురక్షిత భావం, కోపం కథకు భావోద్వేగ బలాన్ని జోడించాయి. ఇంకా చెంబన్ వినోద్, చాందినీ శ్రీధరన్: సునీల్, మెరిందా పాత్రలు కథలో కీలకమైనవి. చాందినీ, ముఖ్యంగా, తన మిస్టీరియస్ పాత్రలో క్లైమాక్స్‌లో ఆశ్చర్యపరిచింది. చెంబన్ తనదైన హాస్యం తో మెప్పించాడు. శివజిత్, షబరీష్ వర్మ వంటి సహాయక నటులు కూడా తమ పాత్రలకు న్యాయం చేశారు.
సాంకేతిక అంశాలు:
షైజు ఖాలిద్ ఛాయాగ్రహణం విజువల్‌గా ఆకర్షణీయంగా ఉంది. కల్లు షాప్ లోపలి సన్నివేశాలు, వర్షపు రాత్రి వాతావరణం కథకు సరైన టోన్‌ను సెట్ చేశాయి. విష్ణు విజయ్ అందించిన బ్యాక్‌గ్రౌండ్ స్కోర్ సస్పెన్స్, కామెడీ మూడ్‌లను బాగా పెంచింది. షఫీక్ ముహమ్మద్ అలీ ఎడిటింగ్ నాన్-లీనియర్ నేరేషన్‌ను ఆసక్తికరంగా నడిపించింది, అయితే కొన్ని చోట్ల స్లో పేస్ అనిపించింది.
ప్లస్ పాయింట్స్
బేసిల్ జోసెఫ్ నటన
ఫస్ట్ హాఫ్‌లో హాస్యం, సస్పెన్స్
నాన్-లీనియర్ కథనం
షైజు ఖాలిద్ సినిమాటోగ్రఫీ
మైనస్ పాయింట్స్
సాగదీత సన్నివేశాలు
క్లైమాక్స్‌లో పట్టు లేకపోవడం
పాత్రల వినియోగం
చివరిగా....
‘ప్రావిన్ కూడు షాప్పు’ సినిమా ఒక క్లాసిక్ క్రైమ్ థ్రిల్లర్ కాకపోయినా.. దాని ప్రత్యేకమైన సెట్టింగ్, బహుళ దృక్కోణాలు, బ్లాక్ కామెడీతో కూడిన విధానం ప్రేక్షకులను కట్టిపడేసేదిగా రూపొందింది. మొత్తంగా.. వెరైటీ కథాకథనాలు ఒక సరదా, సంక్లిష్ట అనుభవాన్ని అందిస్తుంది. క్రైమ్ థ్రిల్లర్స్ ను ఇష్టపడే ప్రేక్షకులకు ఈ సినిమా బెస్ట్ ఆప్షన్.