భారత క్రికెట్‌కి పుజారా వీడ్కోలు
భారత టెస్ట్ క్రికెట్‌లో ఎన్నో సుదీర్ఘ ఇన్నింగ్స్ ఆడిన చేతేశ్వర్ పుజారా, తన క్రికెట్ ప్రయాణానికి ముగింపు పలికారు. అన్ని ఫార్మాట్ల భారత క్రికెట్ నుండి ఆయన రిటైర్మెంట్ తీసుకున్నట్లు అధికారికంగా ప్రకటించారు. 37 ఏళ్ల వయసులో పుజారా రిటైర్మెంట్ ప్రకటించడంతో దేశవ్యాప్తంగా అభిమానుల్లో ఆవేదన కలిగింది.
రాజ్‌కోట్‌లో పుట్టి పెరిగిన పుజారా చిన్న వయసులోనే క్రికెట్‌పై ఆసక్తి చూపించారు. క్రమంగా సౌరాష్ట్ర క్రికెట్ అసోసియేషన్ ద్వారా తన ప్రతిభను నిరూపించి, టీమ్‌ ఇండియాకు చేరుకున్నారు. తన గట్టి స్థిరమైన ఆటతీరు బ్యాటింగ్ శైలితో ఆయన జట్టులో "ద వాల్‌ 2.0" అనే బిరుదు సంపాదించుకున్నారు.
పుజారా భారత తరపున 103 టెస్ట్ మ్యాచ్‌లు ఆడి 7,195 పరుగులు చేశారు. ఆయన సగటు 43.60 కాగా, 19 శతకాలు, 35 అర్ధశతకాలు సాధించారు. ఈ గణాంకాలు ఆయన ఎంత స్థిరంగా, ఎంత సహనంతో ఆడారో చూపిస్తాయి. టెస్ట్ క్రికెట్‌లో భారత్‌కి అండగా నిలిచిన బ్యాట్స్‌మన్‌గా పుజారా ఎప్పటికీ గుర్తించబడతారు.
2018-19 ఆస్ట్రేలియా టూర్‌లో ఆయన 521 పరుగులు చేసి ప్లేయర్ ఆఫ్ ది సిరీస్ అవార్డు గెలిచారు. ఆ సిరీస్ భారత్‌ చరిత్రలో అత్యంత గొప్ప విజయంగా నిలిచింది. అలాగే 2021 గబ్బా టెస్ట్‌లో ఆయన చేసిన 56 పరుగులు కూడా అభిమానుల గుండెల్లో చెరగని ముద్ర వేశాయి. బౌలర్ల బంతులు శరీరంపై తాకినా, గట్టి సహనంతో జట్టు విజయానికి దోహదపడ్డారు.
ప్రస్తుత కాలంలో బ్యాట్స్‌మన్‌లు త్వరగా రన్స్ చేయాలని ఇష్టపడతారు. కానీ పుజారా మాత్రం ఓర్పు, క్రమశిక్షణతో ఆడి మ్యాచ్‌ను నిలబెట్టేవారు. అందువల్ల ఆయనకు ప్రత్యేక స్థానం వచ్చింది.
రిటైర్మెంట్ సందర్భంగా పుజారా తన చిన్ననాటి కలలను గుర్తుచేసుకున్నారు. భారత జెర్సీ వేసుకుని జాతీయ గీతం పాడటం ఇప్పటికీ తన జీవితంలో అద్భుత క్షణమని అన్నారు. అభిమానులు, కోచ్‌లు, బీసీసీఐ, సౌరాష్ట్ర క్రికెట్ సంఘం, కుటుంబ సభ్యులు అందరికీ కృతజ్ఞతలు తెలిపారు. తన తండ్రి ఇచ్చిన ప్రేరణను ప్రత్యేకంగా గుర్తు చేసుకున్నారు.
అనిల్ కుంబ్లే సహా అనేక మంది మాజీ ఆటగాళ్లు పుజారా నిర్ణయంపై స్పందించారు. "భారత క్రికెట్‌కి ఆయన చేసిన సేవలు మరువలేనివి" అని ప్రశంసించారు. అభిమానులు కూడా సోషల్ మీడియాలో ఆయనకు గౌరవప్రధానమైన వీడ్కోలు అందిస్తున్నారు.
భారత క్రికెట్‌కి పుజారా ఒక సైలెంట్ వారియర్‌. పరుగుల వర్షం కురిపించకపోయినా, అవసరమైన సమయంలో గట్టిగా నిలబడి జట్టుకు అండగా ఉన్నారు. ఆయన రిటైర్మెంట్‌తో ఒక యుగానికి ముగింపు అయినప్పటికీ, ఆయన జ్ఞాపకాలు, ఆయన ఇచ్చిన పోరాట పాఠాలు ఎప్పటికీ నిలిచిపోతాయి.