అమెరికాలో 48వ తానా మహాసభల ఘన ప్రారంభం

అమెరికాలోని మోటారు నగరంగా ప్రఖ్యాతి పొందిన డెట్రాయిట్ నగరం, జూలై 4వ తేదీన (అమెరికా స్వాతంత్ర్య దినోత్సవం) తెలుగు ప్రజల ఉత్సాహంతో మార్మోగింది. తానా (Telugu Association of North America) ఆధ్వర్యంలో నిర్వహించబడుతున్న 48వ తానా మహాసభలు, ఎంతో వైభవంగా, ఆత్మీయతతో ప్రారంభమయ్యాయి.

ఈ మహాసభలకు ముఖ్య అతిథిగా హాజరైన ఆంధ్ర ప్రదేశ్ శాసనసభ ఉపసభాపతి రఘు రామ కృష్ణంరాజు (RRR) గారు, అమెరికాలోని తెలుగు ప్రజల సాంస్కృతిక చైతన్యానికి, మాతృభాష ప్రేమకు ఘనంగా అభినందనలు పలికారు. ఆయన సభలో మాట్లాడుతూ తెలుగు భాషకు, సంస్కృతికి విదేశాల్లో ఇంత ఆదరణ ఉండటం మనం గర్వించదగిన విషయం. అమెరికాలో పుట్టిన, పెరిగిన తెలుగు యువతలో కూడా తానా వంటి సంఘాలు భారతీయతను పోషిస్తున్నాయి అని ప్రశంసించారు.

ఈ వేడుకల్లో పలు రాష్ట్రాల నుండి వచ్చిన ప్రముఖులు, కళాకారులు, నాయకులు పాల్గొన్నారు. వీరిలో రాజకీయ ప్రముఖులు, వ్యాపారవేత్తలు, విద్యావేత్తలు, టాలీవుడ్ నటీనటులు కూడా ఉండడం విశేషం.

తానా మహాసభలు 2–3 రోజులు పాటు సాగుతాయి. ఇవి భాషా ప్రేమికులకు, కళాకారులకు, యువతకు, వాణిజ్యవేత్తలకు ఒక ఆత్మీయ వేదికగా నిలుస్తాయి. భారత్‌కు దూరంగా ఉన్నా, మన సంస్కృతిని నిలబెట్టుకునే పోరాటానికి ఈ సభలు మకుటాయమాన ఉదాహరణ.