జిల్లాల పేర్ల మార్పు – ఏపీ కేబినెట్‌లో కీలక చర్చ
ఆంధ్రప్రదేశ్ ప్రభుత్వం ఈ నెల 13న ముఖ్యమంత్రి నేతృత్వంలో జరగబోయే కేబినెట్ సమావేశంలో జిల్లాల పేర్లు, సరిహద్దుల మార్పులపై చర్చించనుంది. ఈ విషయంలో ఇప్పటికే జూలై 22న ప్రత్యేక కేబినెట్ సబ్‌కమిటీని ఏర్పాటు చేసింది.ఈ కమిటీలో అనగాని సత్యప్రసాద్, పీ. నారాయణ, వంగలపూడి అనిత, బీసీ జనార్దన్ రెడ్డి, నిమ్మల రామానాయుడు, నాదెండ్ల మనోహర్, సత్యకుమార్ యాదవ్ మంత్రులు సభ్యులుగా ఉన్నారు. రెవెన్యూ శాఖ ప్రత్యేక ప్రధాన కార్యదర్శి ఈ కమిటీకి కన్వీనర్‌గా వ్యవహరిస్తున్నారు.
కమిటీ ప్రధానంగా జిల్లాల పేర్లు, సరిహద్దుల మార్పులపై ప్రజల నుండి వచ్చిన వినతులు, సూచనలు, అభ్యంతరాలను పరిశీలిస్తుంది. అలాగే చారిత్రక, సాంస్కృతిక అంశాలు, ప్రాంతీయ గుర్తింపు, పరిపాలనా సౌలభ్యం వంటి విషయాలను కూడా పరిగణనలోకి తీసుకుంటుంది.ఈ వివరాలన్నింటినీ సమగ్రంగా పరిశీలించిన తరువాత కమిటీ నివేదికను సిద్ధం చేసి ప్రభుత్వానికి అందజేస్తుంది. ఆ నివేదిక ఆధారంగా చివరి నిర్ణయాలను ప్రభుత్వం తీసుకోనుంది. ప్రజల అభిప్రాయాలకు గౌరవం ఇచ్చే విధంగా ఈ ప్రక్రియ కొనసాగుతుంది.