అప్పుడే ఓటీటీలోకి రాబోతున్న ‘మిరాయ్’

టాలెంటెడ్ యంగ్ హీరో తేజ సజ్జ నటించిన 'మిరాయ్' చిత్రం ప్రస్తుతం థియేటర్లలో నడుస్తోంది. ఈ సినిమా సెప్టెంబర్ 12న విడుదలైంది, అయితే థియేటర్లలో విడుదలైన కేవలం నాలుగు వారాల్లోనే ఇది ఓటీటీలోకి రాబోతోంది. స్ట్రీమింగ్ హక్కులు కలిగిన జియో హాట్‌స్టార్, అక్టోబర్ 10 నుండి ఈ చిత్రం స్ట్రీమింగ్ అవుతుందని అధికారికంగా ప్రకటించింది. అంటే, థియేట్రికల్ విడుదలై సరిగ్గా 28 రోజుల తర్వాత ఈ చిత్రం అందుబాటులోకి వస్తుందన్నమాట.

జియో హాట్‌స్టార్ "తొమ్మిది శాస్త్రాలు. అనంతమైన శక్తి. బ్రహ్మాండాన్ని రక్షించడానికి ఒకే ఒక్క సూపర్‌ యోధుడు ‘మిరాయ్’. ఇండియా సొంత సూపర్‌ హీరో, మీ ఇంటికి వస్తున్నాడు. అక్టోబర్ 10 నుండి స్ట్రీమింగ్." 'మిరాయ్' చిత్రానికి కార్తీక్ ఘట్టమనేని దర్శకత్వం వహించాడు. ఈ చిత్రం ప్రపంచవ్యాప్తంగా దాదాపు ₹150 కోట్లు వసూలు చేసింది.

నిర్మాతలు దీనిని హిందీ మార్కెట్‌లో సంచలనం సృష్టిస్తుందని ఆశించినప్పటికీ, ఈ సినిమా ప్రధానంగా తెలుగులోనే బాగా ఆడింది. హిందీలో మాత్రం పరిమిత ప్రభావమే చూపింది. రితికా నాయక్ కథానాయికగా నటించగా, మంచు మనోజ్ విలన్ గా అదరగొట్టాడు. మరి ఓటీటీలో ఈ సినిమా ఇంకెంతగా అప్లాజ్ తెచ్చుకుంటుందో చూడాలి.