థియేటర్స్ లో ఫట్.. ఓటీటీలో సూపర్ హిట్ !
ఈరోజుల్లో ఓటీటీ ప్లాట్‌ఫార్మ్‌లపై సినిమాల రీసెప్షన్ అద్భుతంగా మారుతోంది. థియేటర్లలో నిరాశపరిచిన సినిమాలు ఓటీటీలో ట్రెండింగ్‌లో నిలుస్తుండటం కనిపించదగిన పరిణామంగా మారింది. ఇటీవల విడుదలైన రెండు హిందీ చిత్రాలు ఎమర్జెన్సీ, ఆజాద్ దీనికి పరిపూర్ణ ఉదాహరణలుగా నిలిచాయి.
ఈ ఏడాది జనవరి 17న థియేటర్లలో విడుదలైన ఎమర్జెన్సీ అండ్ ఆజాద్ సినిమాలు భారీ బడ్జెట్‌తో తెరకెక్కినా బాక్సాఫీస్ వద్ద ఆశించిన స్థాయిలో విజయం సాధించలేకపోయాయి. అయితే, ఇప్పుడు ఈ రెండు చిత్రాలు ఓటీటీలో రికార్డులు బద్దలుకొడుతున్నాయి.
బాలీవుడ్ ప్రముఖ నటి కంగనా రనౌత్ దర్శకత్వం వహించిన హిస్టారికల్ పొలిటికల్ డ్రామా ‘ఎమర్జెన్సీ’. థియేటర్లలో ఈ మూవీ ఆశించిన స్థాయిలో ఆకట్టుకోలేకపోయింది. కథను అందించడంతో పాటు ప్రధాన పాత్రలో నటించిన కంగనా ఈ సినిమాను సుమారు రూ. 60 కోట్ల బడ్జెట్‌తో నిర్మించింది. కానీ, థియేట్రికల్ రన్‌లో ఈ సినిమా కేవలం రూ. 22 కోట్ల కలెక్షన్లను మాత్రమే రాబట్టి డిజాస్టర్‌గా మిగిలింది. ఐఎమ్‌డీబీలో 10కి 5.2 రేటింగ్ వచ్చినప్పటికీ, నెట్‌ఫ్లిక్స్‌లో మాత్రం దీనికి విపరీతమైన ఆదరణ లభిస్తోంది. మార్చి 17న ఓటీటీలో స్ట్రీమింగ్ ప్రారంభమైన ఎమర్జెన్సీ నెట్‌ఫ్లిక్స్ టాప్ 3 ట్రెండింగ్ ప్లేస్‌లో నిలిచింది.
ఈ ఏడాది మరో హిందీ సినిమా ‘ఆజాద్’ కూడా థియేటర్లలో నిరాశపరిచిన చిత్రాల్లో ఒకటి. పీరియాడిక్ రొమాంటిక్ యాక్షన్ థ్రిల్లర్‌గా తెరకెక్కిన ఈ చిత్రంలో అజయ్ దేవగన్ మేనల్లుడు అమన్ దేవగన్ హీరోగా, రవీనా టాండన్ కుమార్తె రాషా తడానీ హీరోయిన్‌గా బాలీవుడ్‌లో అడుగుపెట్టారు. అజయ్ దేవగన్ కూడా కీలక పాత్ర పోషించాడు.
అభిషేక్ కపూర్ దర్శకత్వం వహించిన ఈ సినిమాను దాదాపు రూ. 80 కోట్ల భారీ బడ్జెట్‌తో నిర్మించారు. అయితే, థియేటర్లలో ఈ చిత్రం కేవలం రూ. 10 కోట్ల వరకు మాత్రమే వసూలు చేయగలిగింది. ఐఎమ్‌డీబీ రేటింగ్ 4.7గా నమోదైనప్పటికీ, మార్చి 14 నుంచి నెట్‌ఫ్లిక్స్‌లో స్ట్రీమింగ్ అవుతున్న ఆజాద్ ఓటీటీలో టాప్ 4 ట్రెండింగ్‌లో కొనసాగుతోంది.
ఒకేరోజు థియేటర్లలో విడుదలైన ఈ రెండు సినిమాలు ఇప్పుడు ఒకే ఓటీటీ ప్లాట్‌ఫామ్ నెట్‌ఫ్లిక్స్‌లో వరుసగా టాప్ 3, టాప్ 4 స్థానాల్లో నిలవడం విశేషం. థియేటర్లలో విఫలమైనా, డిజిటల్ ప్లాట్‌ఫార్మ్‌లపై వీటి విజయంతో మరోసారి సినిమా రీసెప్షన్‌పై కొత్త కోణం బయటపడింది. ఈ సినిమాల ట్రెండింగ్ చూస్తుంటే, ఓటీటీ ప్రభావం బాక్సాఫీస్‌ను మించి వెళ్లే రోజులు దగ్గరలోనే ఉన్నాయనిపిస్తోంది.