ఈ రెండు వెబ్ సిరీస్ లు రికార్డులు బ్రేక్ చేశాయి !
రీసెంట్ గా అమెజాన్ ప్రైమ్ వీడియో తన రెండు భారీ గ్లోబల్ సక్సెస్ లతో స్థాయిని మరో మెట్టుకు తీసుకెళ్లింది. 2024లో అత్యంత ప్రాచుర్యం పొందిన టాప్-10 అన్యభాషా షోలలో ఒకటిగా నిలిచింది సిటాడెల్: హనీ బన్నీ. ప్రఖ్యాత సిటాడెల్ బ్రాండ్‌కు చెందిన భారతీయ వెర్షన్ ఇది. రాజ్ అండ్ డీకే దర్శకత్వంలో తెరకెక్కిన ఈ యాక్షన్ థ్రిల్లర్‌లో వరుణ్ ధావన్, సమంత ప్రధాన పాత్రలు పోషించారు. గూఢచారి ప్రపంచాన్ని ఆవిష్కరించే ఈ కథ ప్రేక్షకులను ముగ్ధులను చేస్తూ, భారతీయ కథన శైలికి అంతర్జాతీయ గుర్తింపు తీసుకువచ్చింది.
ఇదే సమయంలో, ఇండియాలో ‘మిర్జాపూర్’ 3వ సీజన్ మరో సంచలన రికార్డును సృష్టించింది. అత్యంత ఆసక్తిగా ఎదురుచూసిన ఈ క్రైమ్ డ్రామా ప్రైమ్ వీడియో ఇండియాలో ప్రసారం అయిన వారాంతంలోనే అత్యధికంగా వీక్షించబడిన వెబ్‌సిరీస్‌గా నిలిచింది. ప్రతీ సీజన్‌తో మరింత బలపడుతూ వస్తున్న ‘మిర్జాపూర్’ వెబ్ సిరీస్ ఇండియన్ డిజిటల్ ఎంటర్ టైన్ మెంట్ ను కొత్త స్థాయికి తీసుకెళ్లింది.
‘సిటాడెల్: హనీ బన్నీై’, దాని ఇటాలియన్ వెర్షన్ ‘సిటాడెల్: డయానా’ విజయాన్ని బట్టి చూస్తే.. సిటాడెల్ యూనివర్స్ భవిష్యత్తులో మరింత విస్తరించే అవకాశం ఉంది. మరోవైపు.. టీనేజ్ డ్రామా నుండి హై-స్టేక్స్ ఎస్పియోనేజ్ వరకు విభిన్నమైన కథాంశాలను ఆస్వాదించే ప్రేక్షకులు కొత్త ప్రయోగాలను కూడా స్వాగతిస్తున్నారు. ఈ అంతర్జాతీయ హిట్ షోలు, టాప్ చార్ట్‌లను ఆక్రమిస్తాయా? లేదా కొత్తమైన ప్రాజెక్టులు వాటిని అధిగమిస్తాయా? డిజిటల్ ప్రపంచంలో వచ్చే పెద్ద సంచలనం ఏదో తెలియాలంటే ఇంకాస్త ఎదురుచూడాల్సిందే!