సురేంద్ర రెడ్డి హోప్స్ పెట్టుకోవచ్చా?
2023 సెప్టెంబర్‌లో టాలీవుడ్‌లో ఒక బిగ్ సర్‌ప్రైజ్ అనౌన్స్ మెంట్ వచ్చింది. దర్శకుడు సురేందర్ రెడ్డి, పవర్ స్టార్ పవన్ కల్యాణ్ కాంబోలో ఒక సినిమా. ఈ కాంబినేషన్ అందరినీ ఆశ్చర్యపరిచింది. ఎందుకంటే.. సురేందర్ రెడ్డి అఖిల్ అక్కినేని హీరోగా తెరకెక్కించిన 'ఏజెంట్' సినిమా బాక్సాఫీస్ వద్ద ఘోరంగా ఫ్లాప్ అయింది. అంతే కాకుండా.. పవన్ కల్యాణ్ అప్పటికే రాజకీయాల్లో ఫుల్ బిజీగా ఉండి, సినిమాలకు డేట్స్ ఎప్పుడు ఇస్తాడో కూడా క్లారిటీ లేని సిచువేషన్‌లో ఉన్నాడు. అలాంటి టైంలో ఈ ప్రాజెక్ట్ అనౌన్స్‌మెంట్ అందరికీ షాకిచ్చింది.
అయితే, అంచనాలకు తగ్గట్టే, ఈ ప్రాజెక్ట్ కాస్తా అస్పష్టతలోకి జారిపోయింది. పవన్ కల్యాణ్ తన పెండింగ్ సినిమాలైన 'హరి హర వీర మల్లు', 'ఓజీ', 'ఉస్తాద్ భగత్ సింగ్' వంటి ప్రాజెక్ట్‌లను కూడా ఇంకా కంప్లీట్ చేయలేదు. ఈ సినిమాలు ఎప్పటి నుంచో షూటింగ్‌లో ఉన్నాయి, కానీ ఆయన రాజకీయ కమిట్‌మెంట్స్ వల్ల ఆలస్యమవుతూ వచ్చాయి. ఇక 2024 ఎన్నికల తర్వాత పవన్ కల్యాణ్ ఆంధ్రప్రదేశ్ డిప్యూటీ సీఎంగా బాధ్యతలు చేపట్టడంతో, సురేందర్ రెడ్డి ప్రాజెక్ట్ జరిగే చాన్సెస్ దాదాపు సన్నగిల్లాయి.
పవన్ రాజకీయ బాధ్యతలు, పెండింగ్ సినిమాల షూటింగ్‌ల మధ్య ఈ కొత్త సినిమాకి టైం కేటాయించడం అసాధ్యమనిపించింది. ఇండస్ట్రీలో చాలామంది ఈ ప్రాజెక్ట్ ఆగిపోతుందని ఫిక్స్ అయిపోయారు. కానీ, సురేందర్ రెడ్డికి ఒక చిన్న ఆశా మిగిలింది. పవన్ కల్యాణ్ తన అన్ని సినిమా కమిట్‌మెంట్స్‌ని గౌరవించాలని, వాటిని పూర్తి చేయాలని డిసైడ్ అయ్యారు. ఇటీవలే ఆయన 'ఓజీ' 'ఉస్తాద్ భగత్ సింగ్' సినిమాల షూటింగ్‌ని రీస్టార్ట్ చేశారు. ఇది చూసిన ఇండస్ట్రీ వర్గాల్లో ఒక టాక్ మొదలైంది.. పవన్ తన సన్నిహితుడైన నిర్మాత రామ్ తాళ్లూరితో కలిసి సురేందర్ రెడ్డి సినిమాకి కూడా గ్రీన్ సిగ్నల్ ఇవ్వొచ్చని. రామ్ తాళ్లూరి, పవన్‌కి దగ్గరి ఫ్రెండ్ కావడం వల్ల ఈ ప్రాజెక్ట్‌కి కొంత ప్రాధాన్యత దక్కే అవకాశం ఉందని భావిస్తున్నారు.
మొత్తానికి పవన్ కల్యాణ్ తన రాజకీయ, సినిమా బిజీల నడుమ కాస్త టైం కేటాయిస్తే, ఈ ప్రాజెక్ట్ పట్టాలెక్కవచ్చు. కానీ, అది ఎప్పుడు, ఎలా మెటీరియలైజ్ అవుతుందనేది పెద్ద ప్రశ్న. అంతవరకూ, సురేందర్ రెడ్డి ఫ్యాన్స్, టీమ్ అంతా హోప్‌తో వెయిట్ చేయడం తప్ప వేరే ఆప్షన్ లేదు.