ప్రెగ్నెంట్ అయినా.. ప్రొఫెషనలిజం వీడలేదు
మెగా డాటర్- ఇన్- లా లావణ్య త్రిపాఠి ప్రెగ్నెంట్ అయినప్పటికీ.. ఆమె మళ్లీ స్టూడి యోలోకి అడుగుపెట్టింది. ప్రస్తుతం ‘సతీ లీలావతి’ అనే సినిమా కోసం డబ్బింగ్ చెబుతోంది. చాలా మంది నటీమణులు గర్భధారణ సమయంలో విరామాన్ని తీసుకోవడమే ప్రాధాన్యంగా చూస్తే.. లావణ్య మాత్రం తన వ్యక్తిగత జీవితపు మైలురాళ్లను, ప్రొఫెషనల్ కమిట్‌మెంట్లను సమతూకంగా నడిపిస్తోంది.
‘సతీ లీలావతి’ చిత్రంలో లావణ్యకు జోడిగా మలయాళ నటుడు దేవ్ మోహన్ నటిస్తున్నారు. ‘భీమిలి కబడ్డీ జట్టు’, ‘యస్ యమ్ యస్’ వంటి సినిమాలతో గుర్తింపు పొందిన తాతినేని సత్య ఈ చిత్రానికి దర్శకత్వం వహిస్తున్నాడు. ఇప్పటికే షూటింగ్ పూర్తి చేసుకున్న ఈ చిత్రం ప్రస్తుతం పోస్ట్-ప్రొడక్షన్ దశలో ఉంది, ప్రస్తుతం డబ్బింగ్ కార్యక్రమం కొనసాగుతోంది. మ్యూజిక్ డైరెక్టర్‌గా మిక్కీ జే మేయర్, సినిమాటోగ్రఫీకి బినేంద్ర మేనన్, ఎడిటింగ్‌కు సతీష్ సూర్య పనిచేస్తున్నారు.
ఈ చిత్రం 2025 వేసవిలో విడుదల కావాలని లక్ష్యంగా పెట్టుకుంది. విశ్వసనీయ వర్గాల సమాచారం ప్రకారం, ఇది ఒక బలమైన ఫ్యామిలీ ఎంటర్‌టైనర్‌గా నిలుస్తుందని అంటున్నారు. గర్భవతిగా ఉన్నప్పటికీ లావణ్య తన పాత్రకు స్వయంగా డబ్బింగ్ చెబుతుండటంతో, సినీ వర్గాల్లో ఇది ప్రశంసలకు లోనవుతోంది. లావణ్య, వరుణ్ తేజ్‌ల వివాహం 2023 నవంబరులో ఇటలీ టస్కనీలో కుటుంబ సభ్యులు, సన్నిహితుల మధ్య జరిగింది. 2025 మేలో లావణ్య గర్భధారణ వార్తను ఓ అందమైన ఫోటో ద్వారా పంచుకోవటంతో అభిమానుల్లో ఆనందం నెలకొంది. ఇప్పుడు లావణ్య మళ్లీ తన పని మీద కేంద్రీకరించడాన్ని అందరూ ప్రశంసిస్తున్నారు.