టాలీవుడ్ క్రేజీ డైరెక్టర్ బయోపిక్ !
సినిమా రంగంలో మనం ఎక్కువగా దిగ్గజ నటీనటుల జీవిత చరిత్రలపై బయోపిక్‌లను చూస్తుంటాం. ముఖ్యంగా తెలుగులో వచ్చిన అద్భుతమైన బయోపిక్ ‘మహానటి’కి డైరెక్టర్‌గా నాగ్ అశ్విన్ నిలిచాడు. ఈ సినిమా భారతీయ సినీ పరిశ్రమలోనే అత్యుత్తమ బయోపిక్‌లలో ఒకటిగా గుర్తింపు పొందింది. ఇప్పుడు, ఆసక్తికరంగా, ‘మహానటి’ దర్శకుడైన నాగ్ అశ్విన్ జీవితం కూడా త్వరలో ఒక సినిమాగా రూపుదిద్దుకోనుందని సమాచారం.
ఇటీవల నిర్మాత నాగ వంశీ చేసిన ప్రకటన ప్రకారం, విశ్వక్ సేన్ హీరోగా, డైరెక్టర్ కేవీ అనుదీప్ దర్శకత్వంలో రూపొందనున్న కొత్త చిత్రం నాగ్ అశ్విన్ కథ ఆధారంగా ఉంటుందట. ఈ చిత్ర కథ ఒక యువ దర్శకుడు ఓ ప్రముఖ నిర్మాత కూతురిని వివాహం చేసుకోవడం చుట్టూ తిరుగుతుందని నాగ వంశీ తెలిపారు. ఇది యధార్థంగా నాగ్ అశ్విన్ జీవితం పోలి ఉందని ఆయన హింట్ ఇచ్చారు. నాగ్ అశ్విన్ తన దర్శక ప్రయాణాన్ని మొదలుపెట్టిన సమయంలోనే ప్రముఖ నిర్మాత అశ్వినీ దత్ కూతురు ప్రియాంక దత్‌ను కలుసుకొని, తరువాత ఆమెను వివాహం చేసుకున్న విషయం తెలిసిందే.
దీంతో, విశ్వక్ సేన్ - అనుదీప్ కాంబినేషన్‌లో రానున్న ఈ సినిమా పరోక్షంగా నాగ్ అశ్విన్ బయోపిక్‌గా మారనుందని భావిస్తున్నారు. గమనించాల్సిన మరో ఆసక్తికర విషయం ఏమిటంటే, దర్శకులు అనుదీప్, నాగ్ అశ్విన్ మంచి స్నేహితులు. వీరు ‘జాతిరత్నాలు’ సినిమా సమయంలో కలిసి పని చేశారు. ప్రస్తుతం అనుదీప్ ‘ఫంకీ’ అనే ఓ చిత్రాన్ని రూపొందించేందుకు సిద్ధమవుతున్నారని తెలుస్తోంది. ఈ చిత్రం నాగ్ అశ్విన్ జీవితం ఆధారంగా ఉండొచ్చని టాలీవుడ్ వర్గాల్లో చర్చ జరుగుతోంది.