శ్రీదేవి ఆస్తి వివాదం

బాలీవుడ్ ప్రముఖ నిర్మాత బోనీ కపూర్ తన భార్య, దివంగత నటి శ్రీదేవి పేరున్న ఆస్తిపై తలెత్తిన వివాదం నేపథ్యంలో మద్రాస్ హైకోర్టును ఆశ్రయించారు. చెన్నై ఈస్ట్ కోస్ట్ రోడ్డులో ఉన్న ఆ స్థిరాస్తి తమదే అయినప్పటికీ, ముగ్గురు వ్యక్తులు దానిని అక్రమంగా ఆక్రమించి, వారసత్వ హక్కులు సొంతం చేసుకున్నట్లు తప్పుడు ధ్రువపత్రాలను తయారు చేసుకున్నారని ఆయన కోర్టుకు వివరించారు.

1988 ఏప్రిల్ 19న శ్రీదేవి, ఎం.సి. సంబంద ముదలియార్ అనే వ్యక్తి కుటుంబం నుంచి ఈ ఆస్తిని కొనుగోలు చేశారు. అప్పట్లో ముదలియార్ కుమారులు, కుమార్తెల సమ్మతితోనే రిజిస్ట్రేషన్ జరిగిందని, అన్ని పత్రాలు చట్టబద్ధంగానే ఉన్నాయని బోనీ కపూర్ వాదించారు. ఆ స్థిరాస్తిని తన భార్య ఎంతో కష్టపడి సంపాదించి కొనుగోలు చేసిందని కూడా కోర్టు దృష్టికి తీసుకువచ్చారు.

తాజాగా, ముదలియార్ రెండో భార్య పిల్లలమని పేర్కొంటూ ముగ్గురు వ్యక్తులు ముందుకు వచ్చారు. తాము కూడా ఆ ఆస్తిలో వాటా ఉన్న వారమేనని చెబుతూ, 2005లో తాంబరం తహసీల్దార్ కార్యాలయం నుంచి వారసత్వ ధ్రువీకరణ పత్రం పొందారు. ఈ పత్రం ఆధారంగా భూమిపై హక్కులు చూపించేందుకు ప్రయత్నించారని బోనీ కపూర్ తెలిపారు.

అయితే, ముదలియార్ రెండో వివాహం 1975లో జరిగినదని ఆ ముగ్గురు వాదిస్తున్నప్పటికీ, ఆయన మొదటి భార్య 1999లోనే మరణించారు. అంటే, మొదటి భార్య బతికే ఉన్న సమయంలో రెండో వివాహం జరగడం వలన ఆ వివాహం చట్టబద్ధం కాదని, హిందూ వారసత్వ చట్టం ప్రకారం రెండో భార్య పిల్లలు చట్టబద్ధ వారసులుగా పరిగణించబడరని బోనీ కపూర్ స్పష్టం చేశారు.

ఈ కేసును విచారించిన జస్టిస్ ఎన్. ఆనంద్ వెంకటేష్, తాంబరం తహసీల్దార్‌ ఇచ్చిన వారసత్వ ధ్రువీకరణ పత్రాన్ని పరిశీలించి, నాలుగు వారాల్లోగా తుది నిర్ణయం తీసుకోవాలని ఆదేశించారు. తాంబరం తహసీల్దార్‌కు ఈ సర్టిఫికేట్ ఇవ్వడానికి అధికారం ఉందా అనే అంశాన్నీ పరిశీలించాలని కోర్టు స్పష్టంచేసింది.