మలయాళ హారర్ కామెడీ ‘ప్రకంపనం’
‘మంజుమ్మల్ బాయ్స్’ ఫేమ్ గణపతి, ‘పని’ సినిమాతో మంచి గుర్తింపు పొందిన సాగర్ సూర్య ప్రధాన పాత్రల్లో నటిస్తున్న మలయాళ హారర్ కామెడీ చిత్రం ‘ప్రకంపనం’ రెడీ అవుతోంది. ‘నదిగలిల్ సుందరి యమున’ సినిమాకు సహ-దర్శకుడిగా పనిచేసిన విజేష్ పనత్తూర్ ఈ చిత్రానికి దర్శకత్వం వహిస్తున్నారు. శుక్రవారం ఈ సినిమా టైటిల్ పోస్టర్‌ను మేకర్స్ విడుదల చేశారు.
విజేష్ అందించిన కథను శ్రీహరి వడక్కన్ స్క్రిప్ట్‌గా రూపొందించారు. ఈ చిత్రంలో అమీన్, మల్లికా సుకుమారన్, అజీజ్ నెడుమంగడ్, పి పి కుంహికృష్ణన్, అనీష్ గోపాల్, సానేష్ గినీస్ లాంటి ప్రముఖ నటులు కీలక పాత్రలు పోషిస్తున్నారు. టైటిల్ పోస్టర్ దృశ్యరూపంలో బాయ్స్ హాస్టల్‌ను చూపిస్తూ, మాయాజాలంగా మెరిసే రాత్రి వాతావరణాన్ని చక్కగా చిత్రించారు. ఇది హారర్‌తో పాటు కామెడీకి కూడా తెరపై చోటిచ్చేలా ఉండబోతున్నది.
టెక్నికల్ విభాగాల్లో అల్బీ ఆంటోనీ సినిమాటోగ్రఫీని, ఎడిటింగ్‌ను సోరాజ్ ఈఎస్ నిర్వహించగా, ఆర్ట్ డైరెక్షన్‌ను సుభాష్ కరుణ్ చేపట్టారు. నవరస ఫిలింస్, లక్ష్మీకాంత్ క్రియేషన్స్ బ్యానర్లపై శ్రీజిత్, సుధీష్, బ్లెస్సీలు ఈ చిత్రాన్ని నిర్మిస్తున్నారు.
ఇతర ప్రాజెక్టుల విషయానికొస్తే గణపతి తదుపరి ఖాలిద్ రెహ్మాన్ దర్శకత్వంలో రూపొందుతున్న స్పోర్ట్స్ కామెడీ ‘ఆలప్పుళ జిమ్కానా’ లో నటిస్తున్నాడు. నాస్లెన్ ప్రధాన పాత్రలో నటించిన ఈ చిత్రం ఏప్రిల్ 10న విశూ సందర్భంగా థియేటర్లలో విడుదల కానుంది. ఇదే సమయంలో సాగర్ సూర్య నటిస్తున్న మరికొన్ని చిత్రాల్లో టామ్ ఎమ్మట్టీ తెరకెక్కిస్తున్న ‘పెరున్నాళ్’, ఇంద్రజిత్ సుకుమారన్ ప్రధాన పాత్రలో నటిస్తున్న ‘ధీరం’ ఉన్నాయి.