‘దృశ్యం 3’ షూటింగ్ మొదలయ్యేది అప్పటి నుంచే !

కంప్లీట్ యాక్టర్ మోహన్ లాల్ నటించిన మలయాళ చిత్రాల్లో ‘దృశ్యం’ చాలా ప్రత్యేకమైనది. కేరళ బాక్సాఫీస్ వద్ద అత్యధిక వసూళ్ళు సాధించిన చిత్రాల్లో ఈ మూవీ ఒకటి. జార్జ్ కుట్టి అనే మధ్యతరగతి కుటుంబీకుడు తన ఫ్యామిలీని కాపాడుకోవడం కోసం ఎలాంటి రిస్కు తీసుకున్నాడు? ఏ విధమైన పరిణామాల్ని ఫేస్ చేశాడు అన్నదే కథాంశం. ఇప్పటి వరకూ విడుదలైన ‘ద‌‌ృశ్యం, దృశ్యం2’ చిత్రాలు ఏ రేంజ్ లో సక్సెస్ అయ్యాయో తెలిసిందే. ఇంక ఇప్పుడు ఈ సిరీస్ లో మూడవ భాగం రాబోతోంది.

ఎన్నో ఊహాగానాల తర్వాత, చివరకు ‘దృశ్యం 3’ షూటింగ్ 2025 అక్టోబర్‌లో మొదలవనుందని అధికారికంగా నిర్ధారించారు. ఈ చిత్రాన్ని నిర్మిస్తున్న ఆశీర్వాద్ సినిమాస్, హీరో మోహన్‌లాల్, నిర్మాత ఆంటోనీ పెరుంబావూర్, దర్శకుడు జీతు జోసెఫ్‌లతో కలిసి ఉన్న సరదా క్షణాలతో కూడిన చిన్న వీడియోను షేర్ చేసి ఈ అప్‌డేట్‌ను వెల్లడించింది. 2013లో మొదలై, 2021లో సీక్వెల్‌తో కొనసాగిన దృశ్యం ఫ్రాంచైజీ ఈ మూడో భాగంతో ముగియనుందని భావిస్తున్నారు. తిరిగి రానున్న నటీనటులు, సాంకేతిక సిబ్బంది వివరాల కోసం ఇంకా ఎదురుచూడాలి.

‘దృశ్యం 3’ మోహన్‌లాల్, జీతు జోసెఫ్‌ల కలయికలో ఐదో చిత్రం. ఇంతకు ముందు వీరిద్దరూ ‘దృశ్యం, దృశ్యం 2, 12th మేన్, నేరు’ చిత్రాల్లో కలిసి పనిచేశారు. ప్రస్తుతం వీరు ‘రామ్’ అనే గ్లోబల్ థ్రిల్లర్‌లో కూడా పనిచేస్తున్నారు. కానీ నిర్మాణ సమస్యలతో ఈ ప్రాజెక్ట్ మధ్యలోనే ఆగిపోయింది. జీతు జోసెఫ్ ప్రస్తుతం బిజు మేనన్, జోజు జార్జ్ నటిస్తున్న ‘వలదు వశత్తే కల్లన్’ షూటింగ్‌లో బిజీగా ఉన్నారు. అలాగే, అసిఫ్ అలీ, అపర్ణ బాలమురళి నటించిన ‘మిరాజ్’ చిత్రం పోస్ట్-ప్రొడక్షన్ దశలో ఉంది.

మోహన్‌లాల్ తదుపరి బహుభాషా పీరియడ్ ఎపిక్ ‘కన్నప్ప’ లో కనిపించ నున్నారు, ఇది జూన్ 27న విడుదల కానుంది. మలయాళంలో సత్యన్ అంతిక్కాడ్ దర్శకత్వంలో ‘హృదయపూర్వం’ చిత్రంలో నటిస్తున్నారు, ఇది ఈ ఏడాది ఓణం సందర్భంగా విడుదల కానుంది.