‘ఖైదీ 2’ సన్నాహాల్లో లోకేశ్ కనగరాజ్ ?

లోకేష్ కనగరాజ్ ఇటీవల దర్శకత్వం వహించిన 'కూలీ' సినిమాకి విమర్శలు ఎదురైనా, అది భారీగా వసూలు చేసింది. 'కూలీ' విడుదలకు ముందు, తాను 'ఖైదీ 2' ని త్వరలో తీస్తానని లోకేష్ కనగరాజ్ ప్రకటించాడు. కానీ ఆ తర్వాత.. అతడు రజినీకాంత్, కమల్ హాసన్ కాంబోలో ఒక మల్టీ-స్టారర్ కథను వారికి వినిపించాడు. దీంతో 'ఖైదీ 2' ఆగిపోయిందని వార్తలు వచ్చాయి.

అయితే.. ఇటీవల వచ్చిన సమాచారం ప్రకారం 'ఖైదీ 2' మళ్లీ పట్టాలెక్కింది. రజినీకాంత్, కమల్ హాసన్ మల్టీ-స్టారర్ సినిమాకు సైన్ చేసినప్పటికీ, లోకేష్ కనగరాజ్ ఆ చిత్రానికి దర్శకత్వం వహించట్లేదని తమిళ వర్గాల నుండి సమాచారం. అందుకే అతడు ఇప్పుడు 'ఖైదీ 2' స్క్రిప్ట్‌పై పనిచేయడం మొదలుపెట్టాడు.

ఈ సినిమా షూటింగ్ వచ్చే సంవత్సరం ప్రారంభంలో మొదలవుతుంది. ప్రస్తుతం చేస్తున్న ప్రాజెక్టులను పూర్తి చేసి, కార్తి 'ఖైదీ 2' షూటింగ్‌లో పాల్గొంటాడు. ఈ సినిమా భారీ బడ్జెట్‌తో తెరకెక్కనుంది. 'డ్రీమ్ వారియర్ ఫిల్మ్స్' ఈ సినిమాను నిర్మిస్తున్నారు. త్వరలోనే దీనిపై అధికారిక ప్రకటన వస్తుందని తెలుస్తోంది.