ఈ వార్తలో నిజానిజాలేంటి?
తమిళ నటుడు విశాల్, తన పెళ్లి గురించి ఎప్పుడూ వార్తల్లో ఉంటాడు. తాజాగా, ఈసారి ఆ వార్తలు నిజమవబోతున్నాయని తెలుస్తోంది. తాజా సమాచారం ప్రకారం.. విశాల్ త్వరలో ‘కబాలి’ సినిమాలో నటించిన నటి సాయి ధన్షికను వివాహం చేసుకోబోతున్నాడని టాక్. ఇప్పటి వరకు వీరిద్దరి మధ్య ప్రేమ బంధం ఉందనే ఊహాగానాలు సాగాయి. కానీ ఇప్పుడు ఆ స్నేహం ప్రేమగా మారి, పెళ్లి వరకు వెళ్తోందని సమాచారం. అయితే ఇంత వరకూ విశాల్ లేదా సాయి ధన్షిక ఎవరూ అధికారికంగా ఈ విషయాన్ని ధృవీకరించలేదు.
నిజానికి గతంలో ఓ ఇంటర్వ్యూలో విశాల్ మాట్లాడుతూ.. నడిగర్ సంఘం భవనం నిర్మాణం పూర్తైన తర్వాతనే పెళ్లి చేసుకుంటాను అని చెప్పాడు. ఆ భవన నిర్మాణం అతను ఎంతో పట్టుదలతో ముందుకు తీసుకెళ్తున్న ఒక లక్ష్యం. ఇప్పుడు ఆ నిర్మాణం పూర్తికావడానికి సమయం దగ్గరపడడంతో.. పాత్రికేయులు విశాల్‌ను పెళ్లిపై మళ్లీ ప్రశ్నించారు. ఆయన నవ్వుతూ, “అవును, నేను ఒకరిని ఎంపిక చేసుకున్నాను. ఇది ప్రేమ వివాహమే అవుతుంది. త్వరలోనే పూర్తి వివరాలు తెలియజేస్తాను” అని సమాధానం ఇచ్చారు.
ఇక 48 ఏళ్ల విశాల్ త్వరలో సాయి ధన్షిక నటించిన ‘యోగి డా’ సినిమా ఆడియో లాంచ్‌కు ముఖ్య అతిథిగా హాజరవుతారని టాలీవుడ్ వర్గాలు చెబుతున్నాయి. ఇదే సందర్భంలో వీరి నిశ్చితార్థం జరిగే అవకాశం ఉందనీ, పెళ్లి నాలుగు నెలలలోపు జరగనుందని ప్రచారం. ఇంతలో విశాల్ ఆరోగ్య సమస్యలతో కూడిన మరో వార్తతో కూడా హెడ్లైన్లలోకి వచ్చాడు. తమిళనాడులోని విల్లుపురం వద్ద నిర్వహించిన మిస్ కూవగం ట్రాన్స్‌జెండర్ బ్యూటీ కాంటెస్ట్‌లో పాల్గొన్న సమయంలో విశాల్ అకస్మాత్తుగా చెయ్యి తిరిగిపోయి కుప్పకూలిపోయాడు. వెంటనే ఆయన్ను ఆసుపత్రికి తరలించారు.
తర్వాత, విశాల్ టీమ్ ఒక అధికారిక ప్రకటన విడుదల చేసింది. “ఆ రోజు మధ్యాహ్నం ఆయన తన సాధారణ భోజనం మానేసి కేవలం జ్యూస్ మాత్రమే తీసుకున్నారు. దీంతో శరీర శక్తి తగ్గి ఆయన క్లిష్టతకు గురయ్యారు. అయితే డాక్టర్లు గంభీరమైన ఆరోగ్య సమస్యలేమీ లేవని స్పష్టంగా తెలిపారు” అని వివరించారు.
ఇక సినిమాల విషయానికి వస్తే.. విశాల్ తన కొత్త చిత్రం ‘తుప్పరివాలన్ 2’ కోసం సిద్ధమవుతున్నాడు. ఈ చిత్రం ద్వారా ఆయన దర్శకత్వంలో అడుగు పెట్టబోతున్నాడు. మిస్కిన్‌తో బడ్జెట్ విషయంలో విభేదాలు రావడంతో ఈ చిత్రాన్ని విశాల్ స్వయంగా డైరెక్ట్ చేయనున్నాడు. మొత్తానికి, విశాల్ – సాయి ధన్షిక పెళ్లి నిజం అవుతుందా? లేదా ఇదీ మరో ప్రచారమేనా? అన్నది కొద్దిరోజుల్లో స్పష్టమవుతుంది. కానీ వీరి జంటకు అభిమానుల నుంచి ఇప్పటికే శుభాకాంక్షల వర్షం కురుస్తోంది.