ఆకట్టుకుంటోన్న ‘సర్దార్ 2' ప్రోలోగ్ వీడియో
2022లో విడుదలైన తమిళ స్పై యాక్షన్ థ్రిల్లర్ 'సర్దార్' కి కొనసాగింపుగా వస్తున్న పీరియాడికల్ యాక్షన్ మూవీ 'సర్దార్ 2'. ఈ సినిమాకు సంబంధించి. కార్తీ పాత్రను పరిచయం చేస్తూ ప్రోలోగ్ పేరుతో ఒక వీడియోను ఈద్ సందర్భంగా సోషల్ మీడియాలో విడుదల చేశారు మేకర్స్. ఈ టీజర్ లాంటి వీడియోలో ఈ సారి సర్దార్ మిషన్ చైనీస్ తో లింక్ చేయడం ఆకట్టుకుంటోంది. అలాగే.. విలన్ గా యస్.జే. సూర్యను పరిచయం చేయడం కూడా ఇంప్రెసివ్ గా ఉంది.
తొలి భాగాన్ని రూపొందించిన పీ ఎస్ మిత్రన్ ఈ సీక్వెల్‌కు కూడా దర్శకత్వం వహిస్తున్నారు. ఈ సినిమాలో కార్తి ప్రధాన పాత్రలో నటిస్తున్నారు. మొదటి పార్ట్‌లో ఆయన ద్విపాత్రాభినయం చేసిన విషయం తెలిసిందే. ఇప్పటికే షూటింగ్ జరుపుకుంటున్న ఈ చిత్రానికి ముందుగా ప్రకటించిన యువన్ శంకర్ రాజా స్థానంలో ఇప్పుడు సామ్ సిఎస్ సంగీత దర్శకత్వం వహించనున్నారు. 'ఖైదీ' తర్వాత కార్తి, సామ్ సిఎస్ మళ్లీ కలిసి పనిచేయడం విశేషం. ఈ సినిమా తమిళం, తెలుగు, మలయాళం, హిందీ, కన్నడ భాషల్లో విడుదల కానుంది. విడుదల తేదీపై ఇంకా స్పష్టత రావాల్సి ఉంది. కార్తి సరసన ఎస్ జె సూర్య, మాళవిక మోహనన్, రజిష విజయన్ ముఖ్య పాత్రల్లో నటిస్తున్నారు.
ఈ సీక్వెల్ మొదటి భాగాన్ని కొనసాగిస్తూ.. ఓ పోలీస్ ఆఫీసర్ అంతర్జాతీయ నేర ముఠాను చేధించేందుకు చేసే ప్రయత్నాల్లో ఎదురయ్యే మోసాలు, అవినీతి, కుట్రలను అన్వేషించే విధానాన్ని చూపిస్తుంది. ఇందులో కార్తి ఓ పోలీస్ అధికారిగా, అలాగే నిందితుడిగా మారిన ఓ స్పై పాత్రలోనూ కనిపిస్తారు. మొదటి భాగంలో రాశీ ఖన్నా, చంకీ పాండే, లైలా ముఖ్య పాత్రలు పోషించారు. 'సర్దార్ 2' ప్రిన్స్ పిక్చర్స్ బ్యానర్‌పై నిర్మితమవుతోంది.