‘డెకాయిట్’ కు బాలీవుడ్ లో పోటీ గట్టిగానే ఉంది !
అడివి శేష్ గత కొన్ని సంవత్సరాలుగా వరుస విజయాలతో దూసుకుపోతున్నాడు. తొందరపడకుండా, తన రాబోయే ప్రాజెక్ట్‌లపై పూర్తి ఫోకస్‌తో ముందుకు సాగుతున్నాడు. తాజాగా, అతడు నటిస్తున్న యాక్షన్ డ్రామా ‘డెకాయిట్’ షూటింగ్ పూర్తయింది. ఈ సినిమా డిసెంబర్ 25న విడుదల కానుందని చిత్ర బృందం ప్రకటించింది. అడివి శేష్ గత చిత్రం ‘మేజర్’ పాన్-ఇండియా స్థాయిలో ఘన విజయం సాధించింది. ‘డెకాయిట్’ కూడా హిందీతో పాటు ఇతర దక్షిణ భాషల్లో విస్తృతంగా విడుదల కానుంది. అయితే, హిందీలో ఈ సినిమాకు గట్టి పోటీ ఎదురవుతోంది.
కార్తిక్ ఆర్యన్, శ్రీలీల జంటగా అనురాగ్ బసు దర్శకత్వంలో ఓ రొమాంటిక్ ఎంటర్‌టైనర్ తెరకెక్కుతోంది. ఈ సినిమా టీజర్ ఇప్పటికే అందరి దృష్టిని ఆకర్షించింది. ఈ చిత్రం కూడా డిసెంబర్ 25న విడుదల కానుంది. క్రిస్మస్ సీజన్‌లో బాలీవుడ్ ప్రేక్షకులకు ఇదే మొదటి ఎంపికగా నిలవనుంది.
ఇక అలియా భట్, యశ్ రాజ్ ఫిల్మ్స్ నిర్మాణంలో ఓ భారీ బడ్జెట్ యాక్షన్ సినిమా ‘ఆల్ఫా’లో నటిస్తోంది. ఈ చిత్రంలో శర్వరీ, బాబీ డియోల్ కీలక పాత్రల్లో కనిపించనున్నారు. ‘ఆల్ఫా’ కూడా డిసెంబర్ 25న విడుదలకు సిద్ధంగా ఉంది. ఈ సినిమా కూడా హిందీలో ‘డెకాయిట్’కు గట్టి పోటీనిచ్చే అవకాశం ఉంది. ప్రస్తుతానికి, ఈ క్రిస్మస్ సీజన్‌లో మూడు సినిమాలు బాక్సాఫీస్ వద్ద పోటీ పడనున్నాయి.