అక్షయ్ కుమార్ సూపర్ హిట్ చిత్రానికి మరో సీక్వెల్ !
బాలీవుడ్‌ స్టార్‌ అక్షయ్ కుమార్ ప్రధాన పాత్రలో నటించిన ప్రసిద్ధ కామెడీ డ్రామా చిత్రం ‘హేరాఫేరీ’ గురించి సినీ ప్రియులకు ప్రత్యేక పరిచయం అవసరం లేదు. 2000లో విడుదలైన ఈ చిత్రం బాక్సాఫీస్‌ వద్ద అద్భుత విజయం సాధించి.. ప్రేక్షకుల్ని కడుపుబ్బా నవ్వులు పంచింది. ఈ చిత్రానికి ఇప్పటివరకు ఫ్రాంచైజీగా వచ్చిన భాగాలూ ప్రేక్షకుల్లో మంచి ఆదరణ పొందాయి.
తాజాగా, ఈ సూపర్‌హిట్‌ సిరీస్‌ లో మూడో భాగాన్ని తెరకెక్కించేందుకు చిత్రబృందం సన్నాహాలు చేస్తుందనే సమాచారం వెలువడింది. ‘హేరాఫేరీ 2’ కు కొనసాగింపుగా రూపొందించనున్న ‘హేరాఫేరీ 3’ ను ఫర్హాద్‌ సామ్‌జీ దర్శకత్వం వహించనున్నారు.
ఫిరోజ్‌ నడియాడ్‌ వాలా ఈ చిత్రాన్ని నిర్మించనుండగా, అన్ని కార్యక్రమాలు సజావుగా సాగితే ఈ ఏడాదిలోనే షూటింగ్‌ ప్రారంభం కానుందని అక్షయ్ సన్నిహిత వర్గాలు వెల్లడించాయి. హాస్యభరిత కంటెంట్‌తో మరింతగా నవ్వుల పువ్వులు పూయిస్తుందనే అంచనాలతో ఈ మూడో భాగంపై అభిమానుల్లో భారీ ఆసక్తి నెలకొంది.