'ఉడ్తా పంజాబ్ 2' కి సన్నాహాలు !
బాలీవుడ్ సూపర్ హిట్ క్రైమ్ డ్రామా 'ఉడ్తా పంజాబ్'. ఈ చిత్రం సీక్వెల్ కు ప్లాన్ చేస్తోంది నిర్మాత ఏక్తా కపూర్. ఈ సినిమా పంజాబ్‌లోని డ్రగ్స్ సమస్యను హైలైట్ చేసింది. ప్రాజెక్ట్ ఇప్పుడే ప్రారంభ దశలో ఉంది. అయితే దర్శకుడు, రచయితగా ఆకాష్ కౌశిక్‌ను తీసుకొచ్చినట్లు సమాచారం. అయితే, దీనిపై అధికారిక ప్రకటనా రావాల్సి ఉంది. షాహిద్ కపూర్ మళ్లీ ప్రధాన పాత్రలో నటించే అవకాశముందన్న ఊహాగానాలు వినిపిస్తున్నాయి. చర్చలు మొదటిదశలోనే ఉన్నా.. ఎక్తా కపూర్ అతడిని మళ్లీ తీసుకొచ్చేందుకు ఆసక్తిగా ఉన్నారని తెలుస్తోంది. అయితే, చివరి నిర్ణయం స్క్రిప్ట్ పూర్తి అయిన తర్వాత తీసుకుంటారు.
'భూల్ భులయ్యా 2', 'హౌస్‌ఫుల్ 4' చిత్రాలకు రచయితగా పనిచేసిన ఆకాష్ కౌశిక్ ఈ సీక్వెల్‌కు దర్శకత్వం వహించనున్నారు. అయితే, 'ఉడ్తా పంజాబ్' ను తెరకెక్కించిన అభిషేక్ చౌబే ఈ ప్రాజెక్ట్‌లో లేరు. ఇతర ప్రాజెక్టులతో ఆయన బిజీగా ఉండటమే ఇందుకు కారణం. ఈ సీక్వెల్, మొదటి భాగం కథను కొనసాగించదని, కానీ మళ్లీ పంజాబ్‌లో డ్రగ్స్ సమస్యను మరింత లోతుగా, విచారణాత్మకంగా చూపించబోతున్నట్లు తెలుస్తోంది.
ఈ సినిమా వచ్చే ఏడాది షూటింగ్ ప్రారంభం కానుంది. ఎక్తా కపూర్ ఇంతకు ముందు 'రాగిణి ఎంఎంఎస్ 2', 'ఎల్‌ఎస్‌డి 2', 'ఏక్ విలన్ రిటర్న్స్' వంటి సీక్వెల్ సినిమాలు రూపొందించారు. 'ఉడ్తా పంజాబ్ 2' కూడా ఈ కోవలోనే నిలుస్తుందని భావిస్తున్నారు. ఈ సినిమా కాకుండా, ఎక్తా కపూర్ ప్రస్తుతం 'డ్రీమ్ గర్ల్ 3' మరియు 'వీరే ది వెడ్డింగ్' సీక్వెల్‌పై కూడా దృష్టిపెట్టినట్లు సమాచారం. ఇక 'ఉడ్తా పంజాబ్ 2' కూడా మొదటి భాగం లాగా హార్డ్-హిట్టింగ్ సినిమాగా ఉంటుందా? లేదా కొత్తగా ఏదైనా మార్పులు చేస్తారా? అన్నది చూడాలి.