తమ బిడ్డకి ఇంకా పేరు పెట్టలేదు !
ఈ రోజుల్లో చాలా మంది తల్లిదండ్రులు తమ బిడ్డ పుట్టకముందే పేరు ఎంచుకుంటారు. కుటుంబాలు తరచూ అబ్బాయి, అమ్మాయి రెండు పేర్లను ముందుగానే సిద్ధం చేస్తారు. కానీ సెలెబ్రిటీల విషయంలో మాత్రం అభిమానుల్లో ఉత్సాహం, ఆసక్తి మరింత ఎక్కువగా ఉంటాయి. బాలీవుడ్ బ్యూటీ కియారా అద్వానీ.. జులైలో తమ ఆడబిడ్డను స్వాగతించినప్పటికీ.. ఇంకా తన చిన్నారికి పేరు పెట్టలేదు.
ఈ ఆశ్చర్యకరమైన విషయాన్ని ఆమె భర్త, నటుడు సిద్ధార్థ్ మల్హోత్రా పంచుకున్నారు. కుటుంబ సభ్యుల నుంచి ఎన్నో సూచనలు వచ్చినప్పటికీ, తమ చిన్నారికి సరైన పేరు దొరకలేదని అతడు తెలిపాడు. పేరు ఎంచుకోవడం ఊహించిన దానికంటే కష్టంగా ఉందని సిద్ధార్థ్ ఒప్పుకున్నాడు. అభిమానులను కూడా ఉద్దేశించి, తమ బిడ్డకు పేర్లు సూచించమని కోరాడు. “మేము కొన్ని ఆలోచనలను పరిశీలిస్తున్నాం, త్వరలో ఒక పేరును ఖరారు చేస్తాం,” అని అతడు నవ్వుతూ చెప్పాడు.
ఇక సినిమాల విషయానికొస్తే .. కియారా అద్వానీ ‘వార్ 2’లో పాత్రను పూర్తి చేసిన తర్వాత కొంత విరామం తీసుకుంది. ఆమె ఇప్పుడు తన ఆరోగ్యం, ఫిట్‌నెస్‌పై దృష్టి సారించి, బిడ్డతో క్వాలిటీ టైమ్ గడుపుతోంది. ఆమె సన్నిహిత వర్గాల సమాచారం ప్రకారం.. రాబోయే నెలల్లో సినిమాల్లోకి తిరిగి రీఎంట్రీ ఇవ్వడానికి సిద్ధమవుతోంది. ఇదిలా ఉంటే, సిద్ధార్థ్ మల్హోత్రా వృత్తి, వ్యక్తిగత జీవితాన్ని సమతుల్యం చేస్తూ బిజీగా ఉన్నాడు. 2023లో వివాహం చేసుకున్న ఈ జంటకు భారీ అభిమాన గణం ఉంది, వారి బిడ్డ పేరు ఇప్పటికే బాలీవుడ్ అభిమానుల్లో హాట్ టాపిక్‌గా మారింది.