ఆకట్టుకుంటున్న ‘సన్ ఆఫ్ సర్దార్ 2’ మూవీ పోస్టర్

బాలీవుడ్ డైనమిక్ స్టార్ అజయ్ దేవగన్ తన ఐకానిక్ పగ్గీ లుక్‌తో 'సన్ ఆఫ్ సర్దార్ 2', అధికారికంగా 'ది రిటర్న్ ఆఫ్ ది సర్దార్' అనే టైటిల్‌తో బిగ్ స్క్రీన్‌పై సందడి చేయనున్నాడు. ఈ ఎంతో ఆసక్తిగా ఎదురుచూస్తున్న సీక్వెల్‌కి సంబంధించిన కొత్త పోస్టర్‌ను అజయ్ సోషల్ మీడియాలో విడుదల చేస్తూ, ఈ చిత్రం 2025 జులై 25న థియేటర్లలో విడుదలవుతుందని ప్రకటించాడు.

పోస్టర్‌ను షేర్ చేస్తూ.. “ఇది ఫ్యామిలీ ఫోటో కాదు, రాబోయే సినిమా ధమాకా వార్నింగ్. ‘సన్నాఫ్ సర్దార్ 2’ మూవీ ఈ జులై 25న సినిమాహాళ్లలో..” అంటూ అజయ్ దేవగన్ రాశాడు. ఇంతకుముందు, అజయ్ ఒక టీజర్ పోస్టర్‌ను షేర్ చేశాడు, అందులో అతను పగ్గీలో కనిపించాడు. “ది రిటర్న్ ఆఫ్ ది సర్దార్’ ఈ జులై 25న మీ సమీప సినిమాహాళ్లలో. అని క్యాప్షన్ జోడించి, మృణాళ్ ఠాకూర్, జియో స్టూడియోస్, దేవగన్ ఫిల్మ్స్, టి-సిరీస్‌లను ట్యాగ్ చేశాడు. ఈ చిత్రంలో హీరోయిన్‌గా నటిస్తున్న మృణాళ్ ఠాకూర్, సెట్ నుంచి ఒక క్లాప్‌బోర్డ్ ఫోటోను షేర్ చేస్తూ, “సీన్ 49 షాట్ 5 టేక్ 1 యాక్షన్..” అని క్యాప్షన్ రాసింది.

విజయ్ కుమార్ అరోరా దర్శకత్వంలో రూపొందుతున్న 'సన్ ఆఫ్ సర్దార్ 2'ని జియో స్టూడియోస్, దేవగన్ ఫిల్మ్స్, మరియు టి-సిరీస్ సంయుక్తంగా నిర్మిస్తున్నాయి. 2012లో విజయవంతమైన 'సన్ ఆఫ్ సర్దార్' కథను కొన సాగిస్తూ, ఈ చిత్రం యాక్షన్, కామెడీ, హై-స్పిరిటెడ్ డ్రామాతో తెరకెక్కుతోంది. ఒరిజినల్ చిత్రంలో అజయ్ దేవగన్ జస్సీగా, సంజయ్ దత్ బిల్లూగా నటించారు. సీక్వెల్‌లో సంజయ్ దత్ డాన్‌గా కంటిన్యూ అవుతుండగా.. సంజయ్ మిశ్రా విజయ్ రాజ్ స్థానంలో, మొదటి చిత్రంలో రవి కిషన్ పోషించిన పాత్రలో కనిపించనున్నాడు.